DILI, STLTIMORLESTE.com – Eis Deputadu husi Bankada Partidu Demokratiku no Eis Membru Konselhu Estadu, Virgilio Hornai, nuudar sidadaun ida hatoo ninia apresiasaun boot ba inisiativa Prezidente Republika (PR), Jose Ramos Horta, neebe foti desizaun hodi harii estatua ba Antigu Prezidente Asembleia Konstituante, no Eis Prezidente Republika, Saudozu Francisco Guterres Lu-Olo.
Tuir Virgilio, pasu nee sai nuudar knaar faktual ida hodi valoriza obra, no aliserse sira neebe saudozu husik hela iha prosesu harii Estadu de Direitu Demokratiku Timor Leste (RDTL).
Eis Deputadu nee hateten katak, aleinde ninia papel iha instituisaun Estadu, Saudozu Lu-Olo mos nuudar kuadru rezistensia ida neebe fo kontribuisaun boot ba luta Libertasaun Nasional nian. Ninia dedikasaun neebe aas merese duni hetan rekonhesimentu hodi Estadu.
“Rekonhesimentu Estadu nian ba Saudozu Lu-Olo sai hanesan forma ida hodi valoriza, no memoriza istoria luta heroi sira nian,”dehan Virgilio ba STL, iha ninia rezidensia, Dili, Kinta nee (02/07/2026).
Iha parte seluk Virgilio mos foti Saudozu Lu-Olo nuudar figura eminente, no lider ezemplar neebe jerasaun foun sira tenke banati tuir. Nia foti sae Saudozu nia integridade pesoal neebe metin, liuliu oinsa nia hadok an hosi pratika korupsaun, nepotizmu no meus apoderasaun ba poder hodi uza kargu ba interese privadu ka familia.
Nuudar Eis Prezidente Republika, Saudozu Lu-Olo mos konhesidu nuudar figura neebe humeldade, ho ninia personalidade neebe simples tebes. Maski sae ba kargu boot iha rai laran, ninia moris nafatin refleta no leno an ba moris simples povu aileba sira nian.
Iha ninia komentariu, Virgilio afirma katak, lideransa ida neebe diak mak lideransa neebe presiza konfigura an tuir realidade, no hatudu boa fe atu nunee povu bele banati tuir.
Iha fatin ketak Veteranu, Antonio Xavier mos fo hanoin no apoiu ba kestaun nee hodi haktuir katak, rekonhesimentu ba heroi sira nuudar pasu importante tebes hodi hanorin jerasaun foun konaba valor hosi sakrifisiu no domin ba rai ida nee.
“Valorizasaun ba istoria luta heroi sira nian mak sai hanesan mata dalan boot ba ita hotu, hodi nunee ita labele haluha mos sakrifisiu sira neebe lori ita too ohin loron.”dehan Antonio.
Entretantu antes nee Prezidente Relublika, Jose Ramos Horta konkorda hari estatua Saudozu Antigu Prezidente Republika, Francisco Guterres Lo-Olo iha Parlamentu Nasional nia oin.
“Nee idea diak ida, klaru nia mak Prezidente ba Asembleia Konstituante, hau konkorda, hau haree estatua ida ema seluk iha Jardim PN nee ita la konhese tan, entaun estatua Eis Prezidente Republika Saudozu Lu-Olo nian hau konkorda ho ida nee,” hatete PR, Horta.
(car)
