DILI, STLTIMORLESTE.com – Eskola sanolu resin neen (16) neebe lokaliza iha Munisipiu Bobonaro seidauk hetan lisensa husi Ministériu Eduksaun (ME) liu husi GALA.
Miguel Freitas hanesan Diretor Servisu Edukasaun Munisípiu Bobonaro ba STL liu husi telefone Kinta nee (02/07/2026) dehan, klase paralelu neebe mak foin loke, neebe mak agora daudaun seidauk hetan lisensa husi ME liu husi GALA, maibe nuudar Diretor Eduksaun Bobonaro orienta ona eskola sira nee para bele kompleta sira nian dokumentus rekezitus atu nunee bele submete ba iha GALA.
“Ita nian klase paralelu neebe seidauk hetan lisensa nee mak ensinu sekundariu ida iha Balibo, ensinu sekundariu iha Lolotoe nomos EBC ida, eskola paralelu hirak nee foun foin mak loke daudaun nee, agora ita nian eskola tuan neebe loke husi governu, nee mos sei lubuk ida, nee sei iha sanolu resin tolu (13), inklui ho klase paralelu tolu (3), nee mak hamutuk eskola sanolu resin neen (16), neebe mak seidauk hetan lisensa husi GALA,” nia deklara.
Tuir Diretor SEM Bobonaro katak, nee duni daudaun nee eskola 16 mak seidauk hetan lisensa husi ME, nee sira seidauk hatoo lista nee ba ME, maibe atividades iha eskola 16 nee lao normal hanesan baibain, hanesan implementasaun programa merenda eskolar.nomos atividades prosesu ensinu aprendizajen lao diak, maske eskola 16 nee too ohin loron ssidauk hetan lisensa husi parte ME.
“Ita nian eskola 16 nee seidauk hetan lisensa, maibe atividades hotu iha eskola lao hela, nee duni husu nafatin ba sira tenke trata dokumentus nee aprezenta ba GALA, atu nunee sira bele hetan lisensiamentu,” nia dehan.
Iha fatin seluk, Diretor Servisu Edukasaun Munisipiu Liquiça, Julio da Silva dehan, daudaun nee klase paralelu iha Munisipiu Liquiça hamutuk haat, ensinu baziku rua, ensinu sekundariu jeral ida no tekniku vokasional ida, no manorin hirak neebe mak daudaun nee hanorin iha klase paralelu haat nee sufisiente hela.
“Daudaun nee klase paralelu haat, nee tekvo ida, ESJ ida no Ensinu Baziku rua, agora sekundariu jeral no tekvo nee ita nian bolsa kandidatu profesores nee koloka mai, nee duni ita nian manorin sira iha klase paralelu iha Munisipiu Liquiça nee sufisiente hela, ninia atividades ensinu prosesu aprendizajen kada loron lao diak hanesan baibain,” dehan Julio.
(jac)
