DILI, STLTIMORLESTE.com – Tribunal Judisial Primeira Instansia Dili (TJPID) iha loron Kinta nee (02/07/2026) halao julgamentu ba arguidu ho inisial ZdS neebe komete krime hasoru lezada AdC, neebe akontese iha Bekora.
Iha indisus sufisiente katak, iha loron 19 fulan Novembru tinan 2024, maizumenus tuku 11:00 kalan, iha uma iha Bekora Dili, arguidu haree katak lezada nia telemovel numeru foun tama. Depois arguidu husu ba lezada numeru telemovel nee se nian. Lezada hatan katak nee nia kolega nian. Hafoin husu, tanba kalan ona, lezada ho arguidu ba deskansa.
Iha loron 20 fulan Novembru tinan 2024, maizumenus tuku 3:38 lokraik, iha area loja Seara nian iha Bebonuk Dili, arguidu informa ba lezada katak sira atu ba foti nia roupa sira hodi rai iha nia alin feto nia uma.
Derepente, la iha justifikasaun ruma, arguidu tuku kedas lezada dala tolu, tuku iha lezada nia kabas karuk, halo lezafa sente moras. Tuir mai arguidu kaer lezada nia fuuk, dada no kontinua tuku lezada nia ulun ho kapasete, maibe la konsege tanba lezada defende an ho nia liman karuk, hodi hamosu moras iha nia liman kotuk.
Tuir mai, arguidu kaer metin lezada nia kakorok hodi impede lezada atu koalia. Ikus mai arguidu obriga lezada fila ba uma ho motor. Maibe iha iha dalan klaran, iha Jardim 12 de Novembru, arguidu hapara motor no tuku iha lezada nia kabun iha parte karuk no ho xave motor nee arguidu sona iha lezada nia isin lolon kotuk no tuku fali, kona lezada nia kabas iha kotuk laran sorin karuk.
Too iha uma arguidu obriga lezada tama ba kuartu laran. Maibe lezada lakohi, no arguidu kaer lezada nia fuuk no rasta lezada. Tuir mai, arguidu tuku lezada dala tolu, tuku iha kotuk laran oin ibun, hodi halo lezada sente moras no bubu.
Arguidu, hodi komete hahalok sira neebe deskreve nia hatene katak lei bandu atua ho livre, deliberadamente, no ho konsiensia, la hadook an husi hahalok hanesan nee. Arguidu ZdS ho intensaun atu estraga vitima AdV fizikamente, hodi halo nia moras no bubu, no halo abuzu fiziku ka psikolojiku ba lezada neebe efetivamente akontese duni.
Aleinde nee nia hatene katak ninia hahalok nee bandu no bele hetan kastigu tuir lei nudar krime.
Tanba nee arguidu ZdS nudar autor ba, krime abuzu konjuje tuir artigu 154 husi Kodigu Penal, ho forma Violensia Domestika.
Hatan ba akuzasaun nee, arguidu ZdS deklara ba Tribunal katak, faktus sira neebe Ministeriu Publiku duun ba arguidu nee balun loos no balun sala, tanba iha momentu kalan ema telefone lezada no antes nee arguidu ho lezada iha ona problema.
Arguidu deklara, iha kalan nee lezada halo tiha mode pesawat, tanba nee ema telefone la tama no arguidu foti fali telefone hodi loke mode pesawat no ema nafatin telefone, maibe lezada fo sala fali ba labarik katak labarik mak loke mode pesawat.
Arguidu deklara, bainhira loke tiha mode pesawat, iha kalan nee ema telefone no mensajen mai trata arguidu, maibe lezada hapus tiha, tanba nee arguidu ho lezada diskute malu too arguidu baku lezada dala rua, tuku dala tolu no arguidu uza kapasete hodi habosok lezada, laos lori Kapasete hodi baku lezada.
Arguidu esplika, iha area Seara arguidu la buti lezada nia kakorok, maibe too tiha uma mak foin arguidu buti lezada nia kakorok, tanba tauk vizinu sira haree. No xave nee arguidu fai ba lezada nia kidan.
Arguidu deklara, hafoin problema arguidu ho lezada kontinua moris hamutuk, tanba arguidu husu fali deskulpa ba lezada, no arguidu mos promete katak ba oin sei la repete tan hahalok neebe arguidu halo.
Aleinde nee lezada AdC hateten, iha Seara nia oin arguidu uza liman mak baku lezada kona iha kabaas parte loos, no too tiha uma mak arguidu baku tan no rasta fuuk. No arguidu mos lori helem atu baku lezada, maibe lezada tahan tiha.
Lezada dehan, nomor neebe mak tama iha lezada nia telemovel nee lezada nia kolega.
Hafoin rona tiha parte rua Tribunal deside tama ba alegasaun Ministeriu Publiku no parte Defeza nia.
Iha alegasaun Ministeriu Publiku husu Tribunal atu aplika pena adekuadu no justu ba arguidu.
No parte Defeza husu Tribunal atu fo kastigu neebe mak kman ba arguidu.
Rona tiha parte sira nee Tribunal deside muda ba loron seluk hodi rona desizaun ikus.
Iha audensia Julgamentu nee prezide husi Juiz kolektiva Jose Quintao, José Gonçalvez, Jumiati Freitas, Ministeriu Publiku reprezenta husi Prokurador Aderito Tillman, no arguidu hetan asistensia legal husi Defensor Publiku Marçal Mascarenhas.
(ter)
