DILI, STLTIMORLESTE.com – Governu kontinua simu kritika husi akademista sira, tanba konsidera la seriu investe iha setor agrikultura, maske setor nee nuudar pilar prinsipal hodi garante seguransa ai-haan no hamenus dependensia ba produtu importadu.
Lia hirak nee hatoo husi akademista Universidade Oriental Timor Lorosae (UNITAL), Armando Afonso ba STL iha Becora, Kinta nee (02/7/2026).
“Labele dehan ita nia produsaun nee masimu ona, tanba haree katak dezenvolvimentu setor agrikultura kada tinan governu investe maibe hau hanoin ladun masimu ou la tau seriu ba investimentu iha setor produtivu, liu-liu hasae produsaun ba iha hare nian, tanba ita haree alokasaun orsamentu ba iha MAPPF kada tinan osan nee laos aumenta maibe redus ba beibeik, husi orsamentu nee ita haree katak governu ladun iha seriedade tau planu neebe diak para investe iha setor agrikultura, atu nunee bele hasae produsaun liu-liu hare nian,” dehan nia.
Dekanu nee rekonhese laiha dadus hatudu komparasaun produtu rai laran nomos importasaun, maibe iha realidade haree katak produsaun nee menus, tan nee kada tinan sempre Timor hola fos rai seluk hanesan nasaun Vietnam, Thailandia nomos nasaun sira seluk.
“Setor agrikultura marka pasu deit, ita haree katak kada tinan lima mak governante sira manteim ho ida nee mak ita labele koalia konaba sustentabilidade redusaun ba iha importasaun, tanba ita haree katak Ita nia investimentu nee la seriu ba iha setor agrikultura,” dehan Afonso.
Tanba nee mak mantein ho OJE kada tinan aloka ba iha MAPPF ho montante kiik mak tinan ba tinan se deit bele sae ba kaer governu nafatin marka pasu, tanba OJE nee kabe ba iha dezenvolvimentu setor agrikultura kiik, mak ita labele koalia konaba esportasaun maibe koalia konaba importasaun.
Nia reforsa, laos deit produtu hare maibe haree mos naan maske Timor maioria konsumu ayam potong mak barak nomos naan sira seluk, tanba investe iha setor agrikultura mak ladun seriu, tanba nee kada tinan importa produtu fos nomos produtu sira seluk, maske produtu balun neebe Timor bele produs.
Oinsa atu hasae produsaun iha rai laran tenke haree ba planu neebe prozeta ona iha PDM nian katak 2011, 2030 maibe haree katak buat hirak nee la tuir planu perspektiva neebe ita tau iha planu nia laran.
“Maske kada tinan 5 governu ida sae goervnu ida tun maibe kabe ba planu estratejiku neebe mak iha, atu nunee atinji metas neebe iha, maske iha IX Governu kontinua halao obras neebe liga ba irigasaun, produsaun konaba haree, produsaun hakiak animal no seluk tam, ita laos fo sala ba governante sira, maibe haree katak situasaun kondisaun neebe nasaun nee infrenta laos ita tarde maibe lao nafatin atu nunee tempu ruma bele atinji saida ita nia mehi konaba setor Agrikultura ba iha futuru mai,” dehan nia.
Afeita husi OJE tanba investimentu sira neebe mak kada tinan nia orsamentu tun, maibe hanoin katak orsamentu aloka ba iha MAPPF nee kiik, ida nee atu bele haree orsamentu nee bele absolve ba deit salarial, maibe atividade ba kontinuidade projeitu boot hanesan investe iha area produtivu sira, investimentu ba iha irigasaun, hakiak animal, ida nee afeita duni ba prosesu dezenvolvimentu setor agrikultura.
Kuandu setor agrikultura la lao, oinsa politika MAPPF nian tenke tau iha planu sira nee, para planu neebe detalhadu para konvense ita lider sira para bele halo politika razoável hodi bele aselera prosesu dezenvolvimentu setor agrikultura.
(joa)
