DILI, STLTIMORLESTE.com – Prezidente Republika (PR), Jose Ramos Horta hatoo felisitasaun kaloroza liu ba Donald J. Trump, Governu Estadus Unidus no ba povu Amerikanu neebe selebra aniversariu indepedensia ba dala 250.
Liu husi diskursu iha Embaixada Amerika Kuarta kalan (01/07/2026), hatete iha ida nee hanesan onra ida ba prezidente atu asosia-an, ohin kalan, iha selebrasaun ba Aniversariu Independensia Estadus Unidus Amerika nian ba dala 250.
“Hau hatoo Timor-Leste nia felisitasaun kaloroza liu ba Sua Exelensia Prezidente Donald J. Trump, ba Governu Estadus Unidus no ba povu Amerikanu ba marku istoriku notavel ida-nee. Tinan atus rua lima nulu liuba, fundador sira Estadus Unidus nian proklama ideal sira neebe inspira ona jerasaun sira iha mundu tomak, liberdade, governu reprezentativu, Estadu Direitu no konviksaun ida neebe permanente iha dignidade no direitu sira ema ida-idak nian. Iha nia istoria tomak, Estadus Unidus halo ona kontribuisaun estraordinaria sira ba siensia, ba edukasaun, ba inovasaun, ba dezenvolvimentu ekonomiku no ba promosaun valor demokratiku sira,” dehan Prezidente Republika.
PR Horta dehan, hanesan nasaun hotu-hotu, sira hasoru ona dezafiu no momentu sira transformasaun nian neebe klean. Maibe, reziliensia hosi sira-nia instituisaun no sira-nia povu permite ona ba sira atu sai nafatin hanesan demokrasia ida neebe maka lidera iha mundu no forsa importante ida iha asuntu internasional sira.
Aniversariu ida-nee mos koinside ho períodu ida neebe kontinua aprofunda relasaun sira entre país rua.
“Foin lalais nee ami hetan onra atu simu Adjuntu Sekretariu Estadu Michael DeSombre iha Timor-Leste, hamutuk ho vizita istorika sira hosi responsavel militar aas liu hosi Estadus Unidus nian iha tinan hirak ikus nee, inklui Almirante John Aquilino, Komandante Komandu Indo-Pasífiku Estadus Unidus nian, no Major-Jeneral Andrew J. Chevalier, Adjuntu-Jeneral Guarda Nasional Estadu Rhode Island nian. Sira-nia prezensa iha Díli sublina aprofundamentu ba ita-nia relasaun bilateral sira no reprezenta vizita sira neebe importante liu hosi responsavel sivíl no militar sira Estadus Unidus nian ba ami-nia país iha tinan barak nia laran. Sira-nia vizita reafirma ita-nia kompromisu hamutuk ba dialogu, ba kooperasaun no ba parseria ida neebe metin iha rejiaun Indo-Pasífiku,” katak Prezidente.
Xefe Estadu hatete ba Timor-Leste, Estadus Unidus okupa fatin espesial ida iha memoria nasional. Durante tinan sira Timor luta ba auto-determinasaun, sidadaun Amerikanu barak, universidade, igreja, membru Kongresu no organizasaun sosiedade sivíl hamriik hamutuk ho povu Timor-Leste. Iha tinan ruanulu resinhaat ikus nee, parseria kontinua buras.
Estadus Unidus sai hanesan parseiru ida neebe iha valor iha area edukasaun, saude, agrikultura no kapasitasaun rekursu umanu. Importante liu, kooperasaun ida-nee hametin ona instituisaun sira, kria ona oportunidade sira no hadia vida família timor-oan sira neebe sura labele.
“Forsa boot ida hosi ita-nia relasaun maka investimentu iha ema sira. Liu husi bolsa estudu Fulbright, programa interkambiu akademiku, inisiativa formasaun ba lideransa no programa edukasional barak seluk tan, jerasaun tuituir malu husi estudante, akademiku no profisional timor-oan sira hetan ona konesimentu no esperiensia neebe sira tau iha servisu dezenvolvimentu ita-nia país nian. Ami mos hatoo ami nia agradesimentu klean ba kontribuisaun husi voluntariu sira Peace Corps nian, neebe, durante liu dekada rua, moris no serbisu hamutuk ho komunidade timor-oan sira. Sira-nia kompromisu halo ami-nia eskola sira sai riku, hametin ami nia komunidade sira no kria lasu amizade neebe dura ba tempu naruk entre ita-nia povu sira,” dehan Horta.
Xefe Estadu TL hatutan, hakarak rekonese serbisu estraordinariu neebe halao hosi Seabees Marina Estadus Unidus nian, partikularmente hodi apoia formasaun Kompania Enjenaria F-FDTL, neebe nia projetu infraestrutura komunitaria iha Timor-Leste kontribui ona ba hadia eskola, unidade saude, infraestrutura publika no kapasidade resposta ba dezastre. Sira-nia serbisu konstitui símbolu ida neebe dura ba tempu naruk no vizivel ba amizade entre nasaun rua.
Hamutuk ho kooperasaun neebe buras iha area sira hanesan preparasaun ba dezastre, resposta ba emerjensia, seguransa marítima no reforsu ba kapasidade institusional sira, parseria konkreta sira-nee hatudu kompromisu komun atu harii komunidade sira neebe reziliente liutan no futuru ida neebe seguru liutan.
(eme)
