DILI, STLTIMORLESTE.com – Importante harii tan fatin ka uma ba maluk defisiente ka moras mental sira, atu nunee bele halo tratamentu ba sira iha fatin neebe preapra ona.
Tuir Prezidente Autoridade Munisípiu Ermera, José Martinho dos Santos Soares katak, planu governu atu harii tan uma ba moras mental sira iha Munisipiu Ermera nee, presiza no importante duni. Maske laos nia kompetensia maibe nuudar autoridade munisipiu nian survei ona rai, fatin nee mak iha Postu Administrativu Letefoho.
“Ami rona katak prosesu nee iha Ministeriu Saude too ona iha fundu infraestrutura, hein katak para depois bele harii. Portantu husi parte Munisipiu nian ami fo apoiu tomak, tanba fatin nee diak ba futuru Munisipiu Ermera no munisipiu sira seluk. Iha Ermera nian bele mai netik iha Hospital Referal Nasional ida, neebe bele atende populasaun husi munisipiu seluk,” dehan nia bá jornalista iha ambitu lansamentu programa BdMK SANUTRIO iha Gleno, Ermera, Kinta (02/07/2026).
Tuir nia, harii uma nee importante tebes, tanba saude ema nian nee mak importante liu. Bainhira dezenvolvimentu atu lao ba oin, nia povu tenke saudavel hodi bele partisipa masimu iha prosesu dezenvolvimentu sira.
Hau hanoin prosesu too ona iha GAPI, tuir informasaun neebe ami rona prosesu lao tiha ona. Ita hein deit bainhhira mak assinatura nee kontratu, para Ministra Saude no MPIE bele haree no halo daudaun ona,” dehan nia.
Iha fatin hanesan, Xefe Suku Baboi Kraik, Postu Administrativu Atsabe, Luis Fernandes hatete, harii tan uma ba maluk moras mental sira nee importante duni. Tanba haree ba realidade no situasaun neebe akontese iha rai laran, fatin atu baixa no halo konsulta ba maluk sira nee sei menus tebes, maibe numeru maluk sira neebe sofre moras nee makaas ate balun lao ba mai deit iha estrada no iha dalan sira.
Tuir nia, neebe importante duni ba governu atu kria tan fatin nee iha munisipiu sira, laos deit iha Ermera maibe ba futuru harii tan iha munisipiu seluk, para nunee bele akumula maluk sira nee iha nia fatin hodi halo tratamentu ba sira.
Nunee mos familia husi Pasiente Moras Mental, Veronica de Deus hatete, fatin atu baixa no halo tratamentu ba sira neemak dala ruma la too. Bainhira oan mane nia moras nee sae makas, tenke lori halai lalais mai baixa iha Hospital Nasional Guido Valadares too semana ida hanesan nee mediku sira haruka fila. Too tiha uma dala ruma sae makas fali, entaun familia tenta atu lori tiha ba Laclubar maibe fatin mak la too.
Nia hatutan, husu ba governu atu kria tan fatin moras ba pasiente mental sira, atu nunee sira bele simu tratamentu husi mediku sira ho hakmatek iha sira nia fatin neebe prepara ba.
Entertantu antes nee Xefe Departementu Psikiatria Gaspar HNGV, Gaspar Pereira Quintao rekomenda ba governu atu haree Munisipiu Dili loke tan fatin ida ba defisiente mental, nunee tratamentu iha sira tenke ba fali fatin neebe prepara ona, Nunee pasiente sira bele konese sira nia fatin no ambiente importante mak fo tratamentu.
(dom)
