AMBENO, STLTIMORLESTE.com – Prezidente Komisaun G ho membru Parlamentu Nasional (PN) halao vizita trabalhu ba povu iha Rejiaun Administrativa Espesial Oecusse-Ambeno (RAEOA), hasoru malu ho Prezidente Autoridade RAEOA, Regio da Cruz Salu ho Sekretariu Rejional sira nomos Diretor Rejional sira hotu iha Oecusse.
Vizita nee eimu husi PA-RAEOA, Regio da Cruz Salu ho kultura Timor nian hodi tara tais ba Prezidente Komisaun G, Parlamentu Nasional, Armando dos Santos Lopes, akompanha husi Visi Prezidente komisaun G, Gabriel Soares, Sekretariu Komisaun G, Mateus da Cruz de Carvalho ho Membru Parlamentu nasional sira kompostu husi, Firmino Taeke, deputada Sancha Paixao Bano.
Iha okaziaun nee, PA-RAEOA, Regio da Cruz Salu hatoo benvindu ba Prezidente Komisaun G, Armando dos Santos Lopes ho Visi Prezidente Komisaun G ho membru Parlamentu Nasional sira neebe maka mai vizita Povu Oecusse.
“Hau hatoo benvindu ba Prezidente komisaun C ho Visi Prezidente Komisaun G ho membru parlamentu nasional sira neebe ohin hakat mai Oecusse nuudar ita nia uma hotu iha nasaun Timor Leste (TL), agradese ba prezensa,” dehan PA-RAEOA, Regio da Cruz Salu iha salaun Gabinete Prezidente Autoridade RAEOA Oebau, Kinta (02/07/2026).
Iha biban nee, Prezidente Komisaun G Parlamentu Nasional, Armando dos Santos Lopes hatoo agradese ba Prezidente Autoridade RAEOA ho sekretariu Rejional sira nomos Diretor Rejional sira neebe ohin simu Membru Parlamentu Nasional husi Komisaun G.
“Hau agradese ba Prezidente Autoridade RAEOA ho membru autoridade sira neebe ohin simu ami iha Gabinete Autoridade RAEOA, Oebau Oecusse,” dehan nia.
Tuir observasaun STL iha Gabinete Autoridade RAEOA Oebau, Prezidente Autoridade simu Prezidente Komisaun G ho tara tais no hatoo benvindu ba nai deputadu sira, nunee halao enkontru iha Salaun Gabinete Autoridade RAEOA hahu iha tuku 3 lokraik.
(jos)
