DILI, STLTIMORLESTE.com – Manorin iha Ensinu Pre Eskolar no Ensinu Baziku Central (EBC) iha Munisípiu Bobonaro sei menus, no ba oin presiza aumenta, tanba profesores barak mak reforma tiha ona.
Esplika Diretor Servisu Edukasaun Munisípiu Bobonaro, Miguel Freitas ba STL liu husi telefone, Sesta nee (03/07/2026).
“Ita nian bolsa kandidatu profesores hamutuk 21, sira sai husi nee laiha konhesimentu husi Diretor EBC inklui Diretor SEM Bobonaro mos la hatene, maibe bolsa kandidatu seluk nee ativu nafatin iha eskola neebe antes nee ita koloka ona sira, nee duni ami nafatin identifika iha baze, no sira kestiona konaba sira nian hela fatin nee, maibe agora daudaun husi PNDS mos responde, no husi infraestrutura mos responde ona balun,” nia afirma.
Miguel dehan, liga ba asuntu ida nee, horiseik halao enkontru ho Diretor sira nee husu nafatin, nee duni sira ida fo naran nee mak sira sai husi nee, husi SEM rasik la hatene tuir, nee los duni, tanba nee ba oin presiza aumenta tan profesores, tanba profesores neebe mak reforma, antes nee mos eskola balun iha Bobonaro nee sei menus profesores, depois akompanha ho profesor neebe mak reforma ona.
“Iha 133 professor mak tama ba idade reforma. Agora total eskola hira mak atu aumenta profesores, nee ita presiza haree bazeia ba lista neebe iha, liu-liu ba iha ensinu pre eskolar barak ita presiza aumenta professor, sekundariu ita haree ba iha disiplina, nee kuaze 20 nunee, maibe pre eskolar no ensinu baziku mak sei presiza profesores barak, tekvo nee tuir sira nian area, maizumenus ida rua hanesan nee,” nia informa.
Nia dehan, pre eskolar nee ba oin sei presiza profesores barak liu, nunee mos atu estabelese tan konstrusaun ba fatin ensinu ninia. Kona-ba profesores menus, nee sempre hatoo ba superior sira liu husi enkontru neebe sira halo, tanba iha relatóriu mensal nee sira sempre mensiona beibeik.
(jac)
