DILI, STLTIMORLESTE.com – Prezidente Republika (PR), Jose Ramos Horta hatete, papel inan importante tebes iha familia, tanba baibain inan sira mak halao servisu barak iha uma laran kompara ho mane.
Prezidente Republika Jose Ramos Horta hatoo lia hirak nee liu husi nia diskursu, bainhira halo lansamentu ba programa bolsu da mae kondisional SANUTRIO hadia nutrisaun inan no oan sira iha Munisipiu Ermera, Kinta (02/07/2026).
PR hatete, presiza tau atensaun ba inan ho oan tanba inan sira nee servisu makaas iha familia nia laran.
Prezidente Republika hatete, se hakarak tinan ruma nia laran programa stunting, sub-nutrisaun infantil, inan sira nia saude, bele hatete diak, se hamate tiha sub-nutrisaun ba kosok oan sira, problema stunting, hadia saude inan sira nian.
Xefe Estadu hatutan tan katak, halo programa nunee aumenta liu tan tanba esperiensia no evidensia hatudu ona prosesu estratejia nunee mak diak rezolve. Nee duni buka deit tau orsamentu boot liu tan husi governu nian, agradese ba parseiru internasional sira neebe apoia makaas programa ida nee.
Prezidente Republika hatete, nuudar Xefe Estadu maibe mos nuudar sidadaun tenke hotu-hotu kontente halo buat ruma diak ba kosok oan sira, ba inan sira.
“Tanba inan sira mak terus demais iha rai ida nee, tanba kiak depois sira mak hakiak ita, hakiak labarik oan sira balun lubuk ida iha uma. Inan sira mak tau matan ba labarik sira nia hahan, sira nia eskola, inan sira mak tau matan ba labarik sira moras, inan sira mak lori sira ba eskola, fila husi eskola. Bainhira labarik sira moras iha uma tanis kalan inan mak hadeer needuni papel inan sira hanesan importante tebe-tebes, ita hakruuk ba inan sira. Sira laiha umanidade laiha, sira laiha sosiadade laiha,” dehan PR Horta.
Xefe Estadu hatete, presiza hakruk bai nan sira tanba sira nia papel importante iha familia, tanba dala barak inan mak mak tau matan ba familia uma laran, oan sira no seluk tan, tanba nee presiza fo apoiu ba inan isin rua nomos bebe sira nunee bele hasae nutrisaun redus mal nutrisaun iha rai laran.
Iha biban nee Prezidente Republika hatete, nia vizita komunidade sira iha Munisipiu Ermera laos premeiru vez maibe vizita bebeik ona buka oinsa atu apoiu produsaun kafee iha Ermera.
“Hau mai bebeik Ermera laos primeira vez. Hau mos buka apoiu produsaun kafee iha Timor tomak, iha Ermera. Iha tempu badak hau sei fila mai ho hamutuk ho CCT-NCBA haree saida mak halo nunee aumenta produsaun kafe iha rai laran,” dehan Prezidente Republika.
Prezidente Republika hatete, laos aumenta produsaun kafee deit maibe Prezidente rasik iha ona hanoin oin bele aumenta mos produsaun ba Kakau, Vanilam nomos produtu seluk iha Timor Leste nunee bele hadia ekonomia iha rai laran sai diak liu tan.”Laos kafe deit, kakau, vanila, aifuan, produtu oin oin bele hadia ita nia ekonomia diak liu tan,” katak PR Horta.
(eme)
