DILI, STLTIMORLESTE.com – Ministeriu Publiku iha alegasaun loron Sesta nee (03/07/2026) ba krime ameasa, solisita ba iha Tribunal Singular atu aplika pena multa ba arguidu ho inisial DF hanesan laen, neebe komete krime hasoru lezada inisial AM hanesan feen iha Manleuana.
Iha alegasaun nee Prokurador Aderito Tilman deklara katak, arguidu konfesa imparsial ba faktus neebe iha, katak arguidu halo duni agresaun hasoru lezada.
Prokurador deklara, atu halo prevensaun iha futuru, Ministeriu Publiku husu Tribunal tetu hodi kondena arguidu.
Enkuantu husi defeza, Defensor Publiku João de Carvalho husu Tribunal tetu hodi aplika pena neebe justu ba arguidu mak pena multa.
Rona tiha alegasaun, Tribunal adia ba loron seluk hodi rona desizaun.
Iha indisus katak, arguidu DF ho lezada AM hela no moris hamutuk iha uma ida nuudar feen ho laen dezde tinan 2014.
Durante forma sira nia uma kain, arguidu ho lezada kous oan tolu, feto ida ho mane rua, ekonomikamente lezada ho arguidu depende ba malu.
Loron 21 fulan Agostu tinan 2023, oras tuku 11:00 OTL, arguidu halo agresaun fizika no ameasa lezada iha sira nia uma Aldeia Badiak, Manleuna.
Motivu husi problema, tanba wainhira arguidu fila husi kampus ba uma atu tula lezada hodi ba hatun no hanorin iha eskola 30 de Agosto, maibe lezada haree katak oras atu ba hanorin mos tarde ona, hafoin lezada ho nervozu hodi husu xavi kareta ba arguidu, maibe arguidu la fo xavi, lezada komesa atu ba hadau xavi mak halo arguidu hirus hodi lori liman tuku kedas dala rua ba lezada nia kabas parte los no karuk.
Momentu nee lezada tauk hodi halai sai tiha husi uma laran iha liur, maibe arguidu foti tudik koa modo nian ida hodi duni tuir ho objetivu atu sona lezada, maibe la konsege tanba lezada halai ses ba tiha nia avo nia uma.
Katak antes nee mos arguidu sempre halo agresaun fizika hasoru lezada maibe lezada la ba halo keixa.
Konsekuensia husi agresaun arguidu nian, lezada sente moras iha nia liman parte kabas karuk ho los, lezada la ba halo tratamentu iha sentru Saude, lezada mos sente tauk ho ameasa neebe arguidu halo.
Katak depois mosu problema, lezada ho arguidu hela hamutuk nafatin iha uma ida no halo mos deklarasaun dame malu.
Arguidu halo ho forma livre, ho depropozitu halo agresaun fizika no ameasa hasoru lezada, nudar arguidu nia kaben, hatene katak agresaun mak arguidu halo hasoru lezada, konsidera hanesan meiu ida hodi halo moras ba lezada nia isin, hatene mos katak tudik mak arguidu uja konsidera hanesan aktu ida hodi halo tauk tebes ba lezada.
Hahalok arguidu nian ho konsiensia rasik no hatene katak, hahalok nee lei bandu maibe arguidu halo nafatin.
Ho haalok sira nee, konsidera arguidu DF hanesan autor material ho forma konsumadu no konkursu, Pratika krime ida, Violensia Domestika, husi Lei n° 7/2010, ho forma ofensas integridade fizika simples ho krime ida Ameasa, tuir artigu 145 no artigu 157, husi Kodigu Penal.
Prosesu nee prezide husi Juiz Koletivu, Jose Escurial, Fransisca Cabral, Juiz estajiadu, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku, João de Carvalho.
(ter)
