DILI, STLTIMORLESTE.com – Kondisaun tinta zebra kross neebe komesa lakon iha kapital sidade laran hatudu kondisaun preokupante, tanba lori ameasa boot ba seguransa ema neebe lao ain sira neebe presiza hakur estrada ho seguru.
Bazeia ba observasaun direita no faktu neebe hatudu iha imajen, markasaun trafegu ba fatin hakur nian iha estrada balu lakon ona nia kores orijinal no la moos ona hanesan baibain.
Situasaun nee sai hun ba preokupasaun boot tanba tinta mutin neebe uza hodi pinta markasaun zebra kross nian iha estrada laran kuaze besik lakon hotu tiha. Lakon kores markasaun nee laos deit konaba oin sidade nian, maibe hatudu mos indikasaun konaba kualidade material neebe uza iha aseptu konstrutivu infraestrutura rodaviariu nian.
Kondisaun markasaun trafegu neebe besik lakon hanessn nee hamosu preokupasaun boot ba seguransa ema neebe lao ain sira, liuliu labarik sira, foinsae nomos katuas no ferik sira neebe presiza estrada nee hodi hakur ho seguru.
Bainhira simblu mutin nee lakon, kbiit funsional husi zebra kross nian mos hamenus, hodi husik hela uza nain sira iha estrada laran hodi hasoru risku boot ba asidente rodaviariu.
Haree husi dook, kondisaun zebra kross neebe la mos ona nee difikulta tebes kondutor sira, liu liu motorista no kores nain sira hodi identifika fatin hakur nian. Difikuldade nee nee sae liutan ba nivel neebe todan liu iha tempu kalan tanba menus naroman, ka mos bainhira udan boot neebe hamenus vizaun kondutor nian hodi foti desizaun trava nian.
Akeinde nee, menus kualidade husi pintura nian mos hatudu katak fakta monitorizasaun no manutensaun regular husi kompanhia sira neebe kaer estrada nee ka husi intitisaun Governu nian foti responsabilidade. Menus kuidadu ba detailhu tekniku kiik hanesan kores markasaun nian lori mos impaktu boot ba dezenvolvimentu sidade neebe mak foin atu medernu maibe kualidade estrada la tuir tempu.
Relasiona ho kestaun nee komunidade Antonio da Silva lamenta tebes ho kondisaun estrada publiku neebe pintura markasaun nian ladura no lakon lalais deit maski foin uza iha tempu badak.
Nia kestiona kualidade implementasaun projetu nian hodi hatoo katak,” Hanesan komunidade ami lamenta tebes ho kualidade tinta neebe uza ba markasaun trafegu sira neee, tanba foin uza maibe lakon lalais ona, nunee ami husu ba parte relevante sira atu keta gasta deit orsamentu estadu nian lemo lemo,”dehan Antonio ba STL, Sesta nee (03/07/2026).
Tanba nee uza nain ba estrada no komunidade sira husu ba parte kompetente hanesan Ministeriu Obras Publiku (MOP) no Diresaun Nasional Transporte Terrestre (DNTT) atu foti pasu lalais hodi halo pintura foun ba markasaun sira nee. Hadia kualidade tinta neebe uza nuudar pasu primeiru neebe urjente tebes hodi asegura kualidade estrada ba tempu naruk no proteje vida povu nian iha movimentu rodaviariu laran.
Iha parte ketak Akademista UNTL, José de Araújo esklarese katak, kualidade pintura ba sinal trafegu sira nee sai kestaun teknika neebe tenke tuir padraun neebe aplika ona hodi nunee bele dura naruk. Tuir nia haree presiza mos foti asaun hodi ejize kualidade no responsabilidade husi parte ezekuor sira, nunee labele fo impaktu ladiak ba gasta orsamentu maibe mos ba vida uza nain sira nian.
(car)
