DILI, STLTIMORLESTE.com – Inspetores sira neebe mak durante nee halo monitorizasaun ba eskola neebe mak lokaliza iha Munisipiu Dili, no rezeltudu husi monitoring refere, sira entrega ona ba superintendente.
Superintendente Edukasaun Munisípiu Dili, Cesarina C. Guterres ba jornalista STL iha nia knaar fatin, Segunda nee (06/07/2026) hatete, durante nee inspetor no inspetora sira halo monitoring ba iha atividades hotu neebe mak lao iha eskola sira iha Munisípiu Dili, tantu husi ensinu pre eskolar, ensinu baziku, sekundariu no tekniku vokasional.
“Relasiona ho inspetora sira nia servisu iha Munisipiu Dili lao normal, tanba tuir ita nian inspetor ho inspetora ida-idak nia area kontrolu no lao tuir sira nia planu no kalendariu neebe entrega ona mai iha superintendente. Problema iha ita nian eskola balun mak eskola seidauk estabelese kontrolu inan aman (KIAR ). Ambiente iha eskola balun foer tanba moru protesaun la iha, Animal hanesan bibi, karau sira tama livre los, ita nian komunidade hela besik iha eskola soe fali foer tama iha ambiente eskola sira,” dehan nia.
Tuir superintendente katak, sira nian parte inspesaun liu husi inspetor eskolar anota hela mensajen iha livru mensajen iha eskola sira atu bele realiza enkontru ho inan aman nunee bele asegura, nee duni inspetor sira halo sira nian servisu tuir idak-idak nian planu neebe mak iha ona, tanba nee rezultadu husi monitoring ba eskola hirak nee entrega ona.
“Ho rezultadu monitoring husi ita nian inspetores sira nian neebe mak ami simu ona no ami bele haree. Ita nian inspetores sira nee monitoring ba atividades saida deit mak lao iha ita nian eskola sura,” nia informa.
Nunee mos Diretor Servisu Edukasaun Munisípiu Bobonaro, Miguel Freitas dehan, inspetores husi nibel pre eskolar, ensinu baziku, sekundariu no tekvo sira nafatin monitoring ba eskola hirak neebe mak lokaliza iha Munisipiu Bobonaro, inspetor nee iha pre eskolar ninia, ensinu baziku, sekundariu no tekvo nian, ida-idak halo monitoring tuir ida-idak nia area ensinu nian, neebe ohin mensiona nee.
“Ita nian ispetores husi nivel pre eskolar, ensinu baziku, sekundariu no tekvo sira nafatin monitoring ba eskola hirak neebe mak lokaliza iha Munisipiu Bobonaro, atu nunee bele identifika mos ita nian manoring neebe mak iha eskola sira, nunee mos difikuldade seluk neebe ita nian eskola sira hasoru,” dehan nia.
Nia dehan, sira nafatin halo linha koordenasaun neebe diak ho inspetor no dirijente husi eskola sira, bainhira inspetor sira remata monitoring ba eskola sira nee para bele hatene dezafiu saida mak eskola sira hasoru.
(jac)
