DILI, STLTIMORLESTE.com – Daudaun nee Komisaun Organizadora ba ezame II periodu nian iha Eskola Sekundáriu Jeral nu. 4 Setembru Balide hahu preparadu, tanba ezame refere sei halao iha loron 13 fulan nee.
Haktuir Diretor Eskola Sekundariu Jeral nu. 4 de Setembru Balide, Sergio A. da Cruz ba STL iha nia knaar fatin, Segunda nee(06/07/2026).
“Konaba ami nian preparasaun ba ezame II periodu nian nee, agora daudaun ami prepara ona, tanba ami kria tiha ona ekipa ba ezame nian nee, hodi elabora pontus ezame no mos servisu lao hela hanesan baibain. Nee duni ami nian komisaun organizadora ba ezame II periodu nian nee, agora daudaun preparadu ona, hodi bele halo preparasaun neebe mak diak ba iha ezame II periodu ninia, neebe ita sei halao iha loron 13 fulan nee,” nia akresenta.
Sergio hatutan, eskola sai antes tiha ona. Konaba konsesaun eskolar nee, nee sai kedas hamutuk ho trimestre premeiru nian. No total estudantes neebe sei partisipa iha ezame segundu ba tinan nee hamutuk 1733 estudantes. Ezekuta konsesaun eskolar nee tuir duni ba nesedidade estudantes nian.
“Hau hanoin ami nian pontus ezame nee elabora tiha ona, agora falta materia 4 tan mak sei olabora, tanba ami nian materia balun profesores sira elabora hotu ona, kada trimestre 10 ribu resin. Ami nian ezame nee sei hahu dia 13 to dia 17 fulan nee, hau nian mensajen ba hau nian estudantes sira katak, husu ba estudante sira estuda no hdok’an husi ransu livre. Inan aman sira presiza kontrola oan sira,” nia informa.
Tuir nia, estudantes sira sei uza sala 24. No laiha estudantes feto neebe gravida, fasilidade meza no kadeira sufisiente hela ba estudantes sira hodi uza ba iha ezame segundu periodu ninia, numeru sala neebe ohin mensiona, ida nee mak estudantes sira sei uza hodi partisipa iha ezame, neebe sei halao iha Segunda semana oin.
“Nuudar Diretor husu nafatin ba hau nian estudantes sira tenke prepara aan estuda no familia idak-idak kontrola sira nia oan, husu atu estuda para hodi hein partisipa iha ezame, kada loron estudantes sira ativu iha prosesu ensinu aprendizajen iha sala, nunee kada disiplina sira simu ona husi ita nian profesores sira, entaun ita nian estudantes ida-idak hein estuda deit ona, nafatin hadook aan husi buat hotu,” nia dehan.
Nia hatete, konsesaun eskolar neebe iha sira sei uza tuir nesesidade neebe mak iha, tanba osan refere tama dala ida ho primeiru trimestre nian, neebe eskola hein ezekuta deit, tanba nee preparasaun eskola nian ba ezame nee prepara aan tiha ona, hanesan kria komisaun, elabora pontus ezame no seluk tan.
Iha fatin la hanesan, Francisca de Jesus hanesan estudante husi ESJ nu. 4 Setembru hatete, los duni katak iha tempu besik estudantes husi eskola hotu sei tuir ezame segundu periodu, nee duni nuudar estudante presiza estuda, tanba atu hetan valor diak nee ema idak-idak presiza esforsu aan mak estuda, lee fila-fali materia neebe profesores sira fo ona.
“Hau sente los duni katak, iha tempu besik estudantes husi eskola hotu sei tuir ezame segundu periodu, nee duni nuudar estudante presiza estuda, tanba atu hetan valor diak nee ema idak-idak presiza esforsu aan mak estuda, lee fila-fali materia neebe profesores sira fo ona ba ami, liu husi Ensinu aprendizajen neebe iha,” nia hatete.
Entretantu Manuel Magno da Costa Mendes, nuudar estudante dehan, ezame segundu periodu nee besik ona, hanesan estudante kuidadu mos saude para too ezame labele moras no tenke estuda, nunee hetan valor diak husi ezame, maibe kuidadu saude mos importante, ho nunee bainhira partisipa iha ezame nee ho kondisaun neebe diak, labele moras.
(jac)
