BAUCAU, STLTIMORLESTE.com – Sentru Formasaun Protesaun Sivil (CFPC) realiza formasaun ba estrutura Autoridade Protesaun Sivil (APC) Munisipiu Baucau, iha area jestaun risku dezastre naturais, primeiru intervensaun, kombate inséndiu no primeiru sokoru ba vitima dezastre.
Xefe Departementu Administrasaun no Finansas CFPC, Adolfo da Costa aprezenta, formasaun refere realiza bazeia ba pedidu husi Komandante Operasaun APC Munisipiu Baucau no Komandante Korpu Bombeiru Baucau, ho objetivu atu hasae kapasidade teknika membru APC no Korpu Bombeiru sira nian responde ba situasaun emerjensia asuntu dezastre naturais nian.
“Objetivu husi formasaun ida nee mak atu hasae kapasidade ekipa sira iha Baucau, liu liu Korpu Bombeiru, atu bele aumenta sira nia konhesimentu no abilidade kona-ba atividade sira neebe diretamente liga ho sira nia knaar loro loron,” dehan Adolfo da Costa ba jornalista sira, hafoin serimónia abertura formasaun iha Salaun APC Munisipiu Baucau, Tirilolo, Segunda (6/7/2026).
Tuir nia, formasaun nee lao liu husi kombinasaun entre teoria no pratika, liu liu demonstrasaun kona-ba kombate indensiu no presta primeiru sokoru ba vitima, atu membru Korpu Bombeiru sira bele aplika prosedimentu operasional ho lo-loos, seguru no efisiente bainhira hasoru situasaun emerjensia.
Aleinde nee, CFPC mos fo materia kona-ba jestaun risku dezastre naturais ba takniku APC Munisipiu Baucau, atu sira bele kontinua halao atividade edukasaun no sensibilizasaun ba komunidade sira iha nivel Suku, hodi hasae preparasaun no hamenus risku dezastre iha komunidade.
Formasaun nee hanesan parte husi esforsu kontinua CFPC atu reforsa kapasidade instituisional APC no Korpu Bombeiru iha Munisipiu sira, hodi hadia prontidaun no efikasia responde ba dezastre no emerjensia iha Timor Leste.
Iha fatin hanesan, Komadante Operasaun APC Munisipiu Baucau, Francisco Viana Freitas sublina, materia ba formasaun refere diriji husi nasional liga liu ba prevensaun kontra insendiu, primeiru sokoru no dezastre naturais nian.
“Objetivu atu aumenta ita nia koinhesementu ba ita nia tekniku sira fo atendimentu diak bainhira halao servisu ruma iha baze. Hau espera katak formasaun nee bele fo motivisaun mai ami atende diak liu tan ita nia komunidade iha baze,” Francisco komenta.
Entretantu, formasaun refere realiza durante loron lima ho total partisipante hamutuk nain 25 husi Diresaun Servisu Korpu Bombeiru Baucau, Dirasaun Nasional Dezastre Munisipiu Baucau inklui Servisu Dezastre Naturais husi Autoridade Munisipal.
(tom)
