DILI, STLTIMORLESTE.com – Antigu Deputadu Husi Bankada Partidu Demokratiku (PD) no Eis Membru Konselhu Estadu, Virgilio Hornai fo sai ninia agradesimentu no rekonhesimentu boot ba kontribuisaun Padre João Felguieras, SJ, neebe remata ninia moris ho idade 105. Misionariu Jesuita nee konsideira nuudar figura boot neebe fo ona dedikasaun tomak ba fiar sarani no moral povu Timor Leste nian.
Virgilio Hornai hateten, falesimentu Padre João Felguieras nee lakon boot ida ba sarani no povu Timor-Leste, tanba misaun pastoral neebe Amu Lulik nee hahu iha rai laran dezde tinan 1971 lao hamutuk ho povu.
Antigu Deputadu nee mos liga importansia misaun nee ho istoria prezensa Misionariu sira husi Portugal iha rai Timor, neebe hahu kedas iha seklu 16 liuhusi ordem Dominikanu (entre tinan 1512 too 1515).
Tuir nia, prezensa istorika nee mak muda estrutura sosial, kultura, no moral sosiadade Tinorense nian husi paradigma dogmatiku fiar tradisional nian hodi simu Jesus Kristu nuudar sentru ba moris.
“Nuudar sarani hau agradese tebes ba kontribuisaun boot, Padre João Felguieras nian ba transformasaun fe umanu povu Timor-Leste nian liuhusi prezensa Igreja Katoliku,”dehan Virgilio Hornai ba STL, iha ninia Rezidensia, Dili, Segunda (06/97/2026).
Aleinde misaun Pastoral, Virgilio dehan Misionariu Jesuita nee mos fo kontribuisau boot ba setor edukasaun iha rai laran liuhusi ninia obra ba hari no kria eskola Menino de Jesus, neebe sai mos eransa boot ida ba labarik no foinsae sira iha Timor-Leste.
Padre João Felguieras, Misionariu Jesuita ho nasionalidade Portuguesa neebe dedika nia moris tomak hodi hamutuk ho povu Timor-Leste iha tempu susar no ukun an, remata ninia jornada moris iha nia tinan 105 ho pasiensia no husik hela eransa Pastoral ida neebe klean ba istoria relijioza iha rai laran.
Iha parte ketak Padre Domingos Alves da Costa haktuir, matebian Padre João Felgueiras nuudar Amu neebe sentenariu no sai sasukat ba moris santu, sosial, no umanu ba komunidade hotu. Matebian hafoin mai iha Timor-Leste dezde tinan 1971, no iha tempu neeba mos asume kargu nuudar Reitor iha Seminariu durante tinan haat ka lima.
“Amu ida neebe haraik domin boot ba Timor oan sira no mos ba rai Timor. Tanba nee mak iha funu 1975, sira la ses husi Timor, maibe simu susar no terus hamutuk ho povu, la halai no lá ses. Nia rasik deklara katak mate iha Timor hanesan Misionariu antigu sira,”dehan Padre Domingos.
Padre Domingos mos esplika katak, durante periodu funu nian, matebian ho ninia kolega Padre José Martins, SJ, nafatin akompanha povu liuhusi orasaun no korajen. Maske iha tempu balun hasoru dezafiu atu tama fali Timor, liuhusi tempu Bispu Dom Carlos Filipe Ximenes Belo, Amu Lulik nee konsege tama duni no haruka nia atu aprende tetun iha Soibada durante tinan ida hamutuk ho Amu Mateus.
Entretantu nuudar sarani Katolika, Antônio da Silva mos espresa ninia laran triste klean, no fo rekonhesimentu ba Padre João (matebian) nia kontribuisaun.
“Padre João Felgueiras nuudar naroman no ezemplu moris neebe boot ba sarani hotu iha Timor-Leste. Ninia laran luak no dedikasaun tomak ba moris espiritual, no edukasaun ba jerasaun foun sira nian sei moris nafatin iha ami nia memoria,” hatoo husi sarani Antônio.
(car)
