DILI, STLTIMORLESTE.com – Maske ema idak-idak iha fiar neebe mak diferente, maibe Jesus hatene saida mak ema idak-idak presiza no saida mak husu ba Nia, tanba nee ema nia fiar metin sei hetan grasa no ksolok.
Padre Paul Kerans, SVD ba STL loron Segunda nee (06/07/2026) hatete, iha evanjelhu ba loron Segunda husi Mateus 9:18-26 iha Evanjelhu ohin nian, Jesus hetan hakbesik husi ema rua neebe la hanesan, ida maka ofisial sinagoga nian neebe kaer papel relijiozu neebe rekonesidu no importante iha komunidade, ida seluk maka feto ida neebe sofre raan fakar, no tanba nia kondisaun, nia konsidera la moos tuir ritual no esklui husi sinagoga.
Ema nain rua nee hakbesik ba Jesus iha dalan neebe la hanesan, ofisial nee hakbesik ba Nia ho nakloke, hakruuk iha Nia oin. Maibe, feto nee ho matenek kona Jesus nia roupa nia ninin, hodi hasees aan husi atensaun.
Maske sira nia pozisaun la hanesan iha komunidade no sira nia aprosimasaun ba Jesus neebe la hanesan, buat neebe sira fahe iha komun maka sira nia fiar neebe klean iha Jesus. Jesus hatan ho laran luak no laran sadia ba ema nain rua nee. Nia kura feto nee nia moras.
“Pasajen Evanjelhu ida nee hatudu katak saida maka importante ba Maromak laos ita nia pozisaun no prestíjiu iha komunidade, no mos oinsa ita hakbesik ba Nia ka oinsa ita reza. Maibe buat neebe importante ba Maromak mak forsa husi ita nia fiar iha Nia no kualidade husi ita-nia relasaun ho Nia,” dehan Padre Paul.
Padre dehan Maromak sempre rona ema nia halerik terus no susar hotu neebe hatoo liu husi orasaun neebe husu ho fiar, tanba husi ema nia fiar mak bele soin nia aan rasik, tanba nee padre husu ema idak idak nafatin tau fiar iha Kristu, maske iha moris hasoru tentasaun oin oin maibe Jesus nunka husik nia atan sira mesak.
“Maromak haree ita hotu nia fiar no fuan neebe hakbesik aan ba Nia no Nia sempre hatan ba ita nia pedidu tulun husi Nia. Hanesan feto iha Evanjellu, ita hetan konvite atu dada liman ho fiar no kona Maromak neebe prezente nafatin mai ita,” dehan Padre.
Bibi atan kreda Katolika nee haktuir tan katak, Maromak mak buat hotu nia hun no rohan, tanba nee nafatin laran metin iha Jesus, tanba nee bainhira hasoru dezafiu oin oin iha moris, keta lakon esperansa ba Jesus, maibe buka hakbesik aan ba Jesus, hatoo buat hotu ba Jesus.
Buat neebe ema hatoo ba Jesus ho fiar no laran metin, Jesus sei rona no sei haraik fali solusaun no grasa iha moris loron loron, tanba nee husu ema hotu hotu labele lakon vontade bainhira hasoru dezafiu maibe koko hakbesik aan ba Jesus, no tau fiar iha Jesus buat hotu sei lao tuir nia dalan, no buat hotu sei lao diak.
Jesus bele rejolve problema, Jesus bele kura moras, no saida deit mak ema hasoru iha moris loron ba loron tanba nee nafatin tau fiar iha Jesus tanba Nain mak hun no rohan amen.
Nunee mos Padre Richardo Pasang, SVD hatutan, refleksaun ba loron Segunda, 6 Julhu 2026 alerta Sta. Maria Goretti iha rai fuik maran moris nian, Maromak bibi atan ho lian neneik hodi bolu ema nia naran.
“Laos atu kastigu hau mai, maibe atu restaura domin. Hanesan noiva neebe laran-metin hein, Nia kesi hamutuk fuan neebe rahun. Balun mai hodi tanis makaas, balu kona deit roupa nia ninin. Maibe maske fiar kiik liu sempre kona Nia fuan,” katak Padre.
Padre hatete, hanesan Maria Goretti, labarik-feto kiik neebe barani, hanorin ema atu hadomi, perdua no fiar katak iha Jesus nia liman, kanek saida deit bele kura.
(eme)
