DILI, STLTIMORLESTE.com – Krime Violensia Domestika kontinua akontese ho númeru neebe aas iha Tribunal sira, tanba nee Jurista konsidera importante halo prevensaun liu husi desizaun Tribunal sira.
“Krime Violensia Domestika ita haree kuaze nia numeru aas iha Tribunal sira, no akontese Violensia Domestika nee mai husi fator oin oin, maibe atu halo prevensaun liu husi desizaun Tribunal nian neebe forte bele halo numeru ba kazu violensia domestika bele redus,” dehan Jurista Jose Maria Guterres ba STL iha Kaikoli, Segunda (06/07/2026).
Tuir Jose, desizaun Tribunal nian kuandu forte, hatudu katak vitima sira neebe komete ona krime sira tauk atu pratika tan krime refere, tanba sira hatene aktu nee lei bandu labele halo.
Nia esplika, presiza mos halo sosializasaun konaba lei Violensia Domestika too iha baze, tanba ema ruma seidauk iha konhesimentu konaba lei Violensia Domestika, ida nee mos sai kauza ida ba sira hodi pratika krime.
Jurista nee husu atu halo prevensaun kedan ba iha Violensia Domestika, tanba la halo prevensaun nia kauza bele too ba iha krime neebe grave. Tanba nee nia parte tau konfiansa ba desizaun neebe Juiz sira foti ba kazu violensia domestika, tanba ho desizaun Tribunal nian bele halo prevensaun iha futuru.
Iha fatin ketak, Akademiku UNTL, Rafael de Jesus dehan, atu halo prevensaun ba iha krime Violensia domestika presiza halo sosializasaun ba lei neebe iha.
“Primeiru presiza sosializa uluk lei ViolensiaDomestika, tanba publiku balu seidauk iha konhesimentu diak konaba lei ViolensiaDomestika, tanba se publiku iha konhesimentu diak konaba lei Violensia Domestika sira mos tauk atu halo krime nee,” dehan nia.
Reforsa, krime Violensia Domestika barak mak pratika husi mane, tanba nee inan sira neebe hasoru violensia labele nonok deit, tenke barani hatoo keixa ba iha Polisia. Tanba inan ida se hasoru Violensia Domestika nonok deit la barani hatoo keixa, aktu neebe iha kontinua akontese iha familia.
Ho nunee enkoraja inan sira neebe hasoru ViolensiaDomestika labele nonok, tenke barani hatoo keixa, no ida nee sai hanesan parte ida hodi halo prevensaun iha futuru.
Antes nee Juiza Administradora Tribunal Baucau, Maria Modesta dehan, krime Violensia domestika kontinua aas iha Tribunal Baucau.
(ter)
