DILI, STLTIMORLESTE.com – Polísia Nasional Timor Leste (PNTL) kaptura ona suspeitu nain 14, tanba sunu uma 14 iha Suku Seurtulan, Postu Administrativu Laklubar, Munisipiu Manatuto.
Protavoz PNTL, Superintendente Polisia João Belo dos Reis dehan, hodi kalan asaltu malu entre Suku Orlalan no Suku Seurtulan rezulta uma 13 mak ahi han no uma lima 5 sunu motuk.
“Hodi kalan iha konfrontu entre populasaun Suku rua iha neeba, ida Suku Orlalan no Suku Seurtulan nee seran malu, no ita detekta katak uma 13 mak hetan sunu, no ida neebe sunu mutuk liu nee uma 5,” hatete Protavoz Polísia Nasional Timor Leste (PNTL), Superintendente Polisia João Belo dos Reis ba jornalista sira liu husi konferensia imprensia iha salaun Komando PNTL Dili, Segunda (06/07/2026).
Nia tenik, husi Postu no Eskuarda Manatuto nian nomos Komando PNTL Munisipiu Manatuto halo kedas intervensaun no sidadaun hamutuk 14 mak PNTL Kaptura no dadaun nee iha sela Polísia Manatuto nian.
Polisia kaptura ona suspeitu nain 14 neebe komete konfrontu fizika entre suku rua neebe akontese iha Domingu kalan (5/72026) rezulta uma hamutuk 18 hetan sunu no autoridade sira evakua vitima sira ba fatin seguru.
Nia hatete, Komando PNTL sei halo investigasaun no rekolha prova sira neebe deskobre lo-loos motivu husi kazu refere. Tanba nee PNTL husu ba Manatuto oan sira atu mantein kalma, evita halo asaun retaliasaun no koopera ho PNTL iha prosesu levantamentu no investigasaun.
“Vitima sira nee sofre husi kazu nee, agora autoridade sira evakua ona sira ba iha fatin seguru no polisia kontinua asegura lokal krime,” nia deklara.
Nia informa, Diresaun Servisu Investigasaun Kriminal (DSIK) mobiliza mos ekipa hodi tun ba iha lokal krime atu buka hatene lo-loos kauza husi insidente nee para identifikasi autor sira neebe involve no lori sira ba prosesu Ministeriu Publiku (MP).
Entretantu Primeiru Ministru Kay Rala Xanana Gusmão, Segunda mee (06/07/2026) maizumenus iha oras tuku 11:43 OTL, tun direita ba iha Komando PNTL hodi fo orientasaun ba Komando Jeral no Segundu Komandante atu haruka ekipa Polisia Diresaun Servisu Investigasaun Kriminal (DSIK) ba fatin akontesimentu.
(jen)
