DILI, STLTIMORLESTE.com – Komando FALINTIL-Forsa Defeza Timor Leste (F-FDTL) hamutuk ho funsionáriu sira husi Ministériu Defeza, Autoridade Marítima Nasionál (AMN) no Institutu Defeza Nasionál (IDN), halao serimonia hasae Bandeira Nasional ba nísiu fulan Julhu 2026, neebe prezide husi Ministru Defeza, Kontra Almirante Donaciano Rosário Gomes “Pedro Klamar Fuik”, iha Kuartél Jeneral F-FDTL Fatuhada, Díli.
Ministru Defeza, Kontra Almirante Donaciano Rosário Gomes “Pedro Klamar Fuik”, iha nia intervensaun, Ministru Defeza (MD) hatete katak serimónia hasae Bandeira Nasionál kada fulan nuudar tradisaun ida neebe forte no importante teb-tebes ba instituisaun sira hotu. Serimónia ida nee mos sai momentu simboliku atu hakruuk ba sakrifísiu povu Timor Leste nian neebe luta naruk atu alkansa liberdade, independénsia no soberania.
“Ita hamutuk fali iha dader ida nee atu kumpri tradisaun ida neebe nobre no importante tebe-tebes ba servidores no instituisaun sira hotu. Wainhira ita haklaken Bandeira Repúblika Demokrátika Timor-Leste sae ba lalehan, ita hanoin fila fali dalan naruk neebe povu Timor-Leste liu hodi konkista liberdade, independénsia no soberania. Kor no símbolu iha Bandeira Nasionál reprezenta korajen, sakrifísiu no esperansa husi jerasaun sira neebe dedika sira nia moris ba konstrusaun Estadu no Nasaun. Wainhira ita kontinensia Bandeira Nasional, ita renova fali ita nia kompromisu atu serve povu ho lealdade absoluta, integridade, disiplina no profisionalismu,” hatete Ministru Defeza Kontra Almirante Donaciano Rosário Gomes “Pedro Klamar Fuik”, liu husi deskuru iha Kuartel Jeneral F-FDTL Fatuhada, Dili, Segunda (06/07/2026).
Ministru Defeza esplika, servisu ba pátria husu kompetensia, dedikasaun no espiritu nasionalizmu husi ema ida-idak, liu-liu atu sempre koloka interese nasionál aas liu interese individuál. Tuir nia hateten, ameasa no dezafiu sira iha mundu ohin loron eziji instituisaun sira atu prepara an ho diak liu tan no hametin kapasidade atu responde ho efikasia.
Nia informa, importante atu reforsa kooperasaun entre Ministériu Defeza, Estadu Maior Jenerál F-FDTL, Autoridade Marítima Nasionál (AMN) no Institutu Defeza Nasionál (IDN), liuhusi promosaun kultura exelénsia, inovasaun, planeamentu estratéjiku no dezenvolvimentu kontinu ba kapasidade umana no institusional.
“Servisu ba patria ezije kompetensia, dedikasaun no esperitu Nasaun. Tan nee, ita presiza reforsa koezaun nasional no kapasidade instituisaun sira atu bele responde ho efikasia ba ezijensia Defeza Nasionál. Iha kontestu ida nee, kooperasaun entre Ministeriu Defeza, Estadu Maior Jeneral F-FDTL, Autoridade Marítima Nasional no Institutu Defeza Nasional sai fator esensial atu promove kultura exelensia, inovasaun, planeamentu estratéjiku no dezenvolvimentu kapasidade umana no institusionál,” nia koalia.
Iha sorin seluk, Ministru Defeza konvida militar no sivil sira atu renova sira nia empenu iha halao knaar ho responsabilidade, esperitu ekipa, respeitu mutu no sentidu aas ba dever. Nia hateten katak tarefa hotu-hotu, maski simples, kontribui ba fortalese Defeza Nasionál no hametin progresu Timor Leste.
“Hau konvida militar no sivil hotu atu halao servisu ho responsabilidade, esperitu ekipa no respeitu mútu. Tarefa idak-idak neebe ita halo, maski simples, iha kontribuisaun importante ba fortalese Defeza Nasionwl no hametin progresu Timor Leste.
Nia hatutan, serimonia hanesan ida nee mls hametin patriotizmu no reforsa konfiansa neebe povu fo mai F-FDTL atu defende soberania nasional, preserva dame, proteje interese Estadu no kontribui ba futuru prosperidade, estabilidade no moris diak ba ema hotu iha Timor Leste.
“Maromak fo nafatin nia bensaun ba ita hotu no ba Repúblika Demokrátika Timor Leste,” nia afirma.
(jen)
