DILI, STLTIMORLESTE.com – Komando FALINTIL – Forsa Defeza Timor Leste (F-FDTL) halao serimonia promosaun Cabo ba militar hamutuk nain 18.
Tuir Adjunto do Xefe Estadu Maior FALINTIL-Forsa Defeza Timor Leste (F-FDTL), Coronel Tirocinado Mario Baptista “BERSAMA” nuudar reprezenta Xefe Estadu Maior Jeneral FALINTIL-Forsa Defeza Timor Leste (F-FDTL) Domingos Raul “Falur Rate Laek” hatoo parabens ba militar sira neebe foin hetan promosaun ba Cabu, tuir lo-loos promosaun halao iha fulan Marsu, tanba nee hodi Komando F-FDTL nian naran husu kompresaun.
“Tanba difikuldade neebe ita infrenta, ita boot sira hatene muito bem ita nia instituisaun, ita foin ukun aan, ita laos prepara hanesan rai sira seluk, maibe iha ita dever militar, ita tenke aseita kondisaun hotu-hotu neebe mak iha, ita hanesan militar tenke simu realidade, difikulade, dezafiu, saida mak ita nia instituisaun hetan ita mos tenke hola parte, hamutuk aseita no simu realidade ida nee,” hatete Adjuntu Xefe Estadu Maior F-FDTL, Coronel Tirocinado Mario Baptista “BERSAMA” ba jornalista sira liu husi nia diskursu iha salaun Quartel General F-FDTL Fatuhada, Dili, Segunda (06/07/2026).
Nia esplika, ba Militar nain 18 neebe foin hetan promosaun Cabu, pasu ida hanesan formasaun inisial no pereparasaun neebe aprende molok atu hakat ba iha pasu tuir mai neebe too iha kursu formasaun ofisial Jeneral.
“Ida nee hanesan formasaun faze ida ba imi, para depois imi hatene imi nia knaar hanesan Cabu atu halo saida, tanba nee saida mak imi aprende ona iha Metinaro labele haluha,” nia informa.
Nia deklara, wainhira iha nivel boot sira metin, hanesan Forsa Armadas nia laran atu metin, baze nee tenke metin, tanba tuir ona formasaun neebe bazika nee iha nivel eskuadra, seksaun, peletaun, komapana, batalin too nivel aas.
“Tanba nee ba ita boot sira labele haluha, tanba tempu nee lao tenke aprende nafatin no buka hatene liu tan ida nee, karik aban atu kursu formasaun ba nivel sargentu, militar tenke iha ambisaun para buka hatene no ba pasu tuir mai,” nia afirma.
(jen)
