AMBENO, STLTIMORLESTE.com – Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu sente ondradu tanba kongresu Internasional Edukasaun Ambiental husi Comunidade dos Países de Língua Portuguesa (CPLP) ba dala 9 sei realiza iha Oecusse iha tinan oin 2027.
Informasaun nee hatoo husi PA-RAEOA, region da Cruz Salu ba STL iha Gabinete Prezidente Autoridade Oebau, Suku Costa, Postu Administrativu Pantemakassar RAEOA, hafoin halao reuniaun dahuluk ho Prezidente Autoridade Turizmu, Virgilio Simith ho ekipa Ministeriu Turizmu no Ambiental (MTA) iha Oecusse, Segunda (06/07/2026) katak, sente ondradu governu sentral eskolha Oecusse sai uma nain ba kongresu Internasioal Edukasaun Ambiental CPLP ba dala 9.
“Hau hanoin kongresu Internasional Turizmu no Ambiental CPLP neebe sei realiza iha Oecusse iha tinan oin 2027, ida nee ondradu ba rai no povu Oecusse no serteza estadu no governu TL, ita agradese fo respeita ba ita nia governu Sentral neebe hili Oecusse, atu bele sai uma nain ba Kongresu internasional CPLP ba ba asuntu edukasaun no ambiental, neebe sei akontese iha fulan Julhu tinan oin,” dehan PA-RAEOA.
Nia dehan ho prezensa komisaun Nasional Virgilio Simith nuudar prezidente ho nia estrutura nasional tomak, reprezenta 9 Governu Konstitusional, tanba nee sei lao tuir programa neebe maka trasa ona, iha matadalan tuir komisaun instaladora ida nee.
“Husi RAEOA esklarese atu harii kedas atu harii sekretariadu konjunta ida, atu nunee ba oin, komesa halo preparasaun ida neebe ke importante, hodi hasoru eventu internasional promove Oecusse iha nivel CPLP direita,” afirma PA-RAEOA.
Iha oportunidade hanesan Prezidente Autoridade Turizmu no Ambiental Impreza Publiku, Virgilio Simith katak, objetivu ohin mai hasoru PA-RAEOA, tanba tinan oin sei realiza Kongresu Internasional ba Edukasaun no ambiental CPLP ninian, Oecusse maka sei sai uma nain ba fatin atu realiza kongresu nee iha RAEO.
“Objetivu ohin ami mai iha Oecusse, hasoru malu ho Prezidente Autoridade RAEOA, tanba tinan oin sei realiza kongresu internasional ba edukasaun no ambiental CPLP nian, Oecusse maka sai uma nain ba ba fatin atu realiza kongresu nee, tanba nee maka ami mai Oecusse, koordena ho PA-RAEOA, hodi hamutuk estabelese komisaun ida neebe maka atu responsabiliza kongresu nee rasik iha TL, liu-liu iha Oecusse,” dehan Prezidente Autoridade Turizmu no Ambiental, Impreza Publiku, Virgilio Simith.
Nia haktuir tan katak, iha reuniaun ohin ho PA-RAEOA, atu instala komisaun de koordenasaun Lokal neebe maka sei iha Oecusse, hodi halo ligasaun permanente ho komisaun nasional, neebe maka responsabel ba eventu nee rasik.
“Ita hotu hatene katak, turizmu hanesan setor ida neebe importante ba sustentabilidade ekonomika, tanba nee dezenvolvimentu turizmu nee lao hamutuk ho setor sira seluk, liu-liu setor infraestrutura, sei setor infraestrutura ladun diak maka setor sira Turizmu mos lao kadig loos, tanba nee oinsa maka atu dezenvolve setor turizmu iha Timor Leste (TL) nomos RAEOA ho fatin sira seluk tan hanesan Atauro, infraestrutura hanesan setor ida neebe maka vital, para apoia setor turizmu nee bele lao diak,” dehan nia.
Iha fatin seluk, Manuel Colo nuudar komunidade Oecusse, sente kontente tanba kongresu internasional Edukasaun no ambiental CPLP Tinan oin sei realiza iha Oecusse.
“Hau nuudar Komunidade Oecusse sente kontente tanba eventu internasional CPLP nian, Oecusse maka sei sai uma nain ba kongresu internasional Edukasaun no Ambiental iha RAEOA. Ita hotu hatene katak, prezensa Portugal iha tinan 500 liu, sira sama ain dahuluk tasi ibun Lifau Oecusse, tanba nee ho sira nia prezensa bele hametin diak liu tan relasaun bilateral entre nasaun CPLP,” afirma nia.
Partisipa iha enkontru nee husi Autoriade Turizmu Timor Leste Impreza Publiku, maka prezidente Autoridade Turizmu, Virgillio Simith, akompanha husi Koordenador Jeral Ambiente, Domingos Mesquita.
(jos)
