DILI, STLTIMORLESTE.com – Akademista sira fo sai sira nia preokupasaun boot kona-ba kualidade asistente saude iha baze, hodi kestiona makaas kazu pasiente ida neebe tenke tula deit iha Gerobak laran hodi ba buka tratamentu mediku tanba falta operasional ambulansia. Realidade real neebe mosu liu husi imajen no video sirkula nee, lori fali diskusaun klean kona-ba lalaok no kualidade asistente emerjensia nian, liu-liu iha area rural sira.
Imajen no video neebe sirkula foti husi insidente ida neebe hatudu pasiente ida ho kondisaun fraku, uza maskara no kaer guarda chuva hodi proteze an husi manas, labele asesu ba transporte neebe dignu husi Governu. Pasiente nee tenke tula deit iha gerobak ai nian neebe dudu hosi membru família hodi lori ba sentru saude besik.
Informasaun neebe espalha iha media sosial no terrenu indika katak, desizaun hodi uza fali gerobak nuudar meus ikus nee tanba ambulansia neebe lojikamente tenke tula pasiente sira iha fatin neeba at hela. Kondisaun nee obriga família kbiit laek sira hodi foti desizaun aririsku nee hodi salva sira nia membru família neebe moras.
Realidade ida nee laos foin dala ida deit mosu, maibe nee reflete obstakulu no problem kronik neebe nafatin akontese iha Postu Administrativu no Munisipiu sira seluk hosi tempu ba tempu, maske alokasaun orsamentu Estadu nian ba setor saude kontinua iha , komunidade iha area rural no fatin remotas nafatin sai vítima husi falta manutensaun ba veikulu emerjensia no kondisaun infraestrutura no kondisaun estrada neebe at.
Situasaun ida nee kria kedan reasaun husi publiku no kestionamentu barak konaba oinsa loos jestaun ba fundu no ekipamentu saude nian neebe aloka ba baze, tanba kazu dudu pasiente ho gerobak nee hatudu distansia boot entre planeamentu governu nian ho realidade neebe povu hasoru loron loron.
Haree ba faktu no kronolojia neebe mosu Akademista hosi UNTL, Gregório da Silva fo komentariu katak, kazu nee nuudar evidensia klara hosi frakeza boot iha jestaun no fiskalizasaun finansiamentu saude nian hosi parte kompetente.
“Governu iha obrigasaun fundamental atu garante katak fasilidade baziku hanesan ambulansia tenke disponível durante oras 24 ba emerjensia. Bainhira komunidade tenke uza fali gerobak, nee laos deit problema tekniku ambulansia aat, maibe nee kestaun dignidade umanu no direitu ba saude neebe la kumpri ho masimu,” Gregório ba STL, Tersa nee (07/07/2026).
Tuir nia, Ministru Saude labele pasivu no tenke no tenke halo kedas auditoria ba kondisaun veikulu emerjensia hotu iha baze, hodi nunee hatene loloos dezafiu saida mak halo ambulansia sira nee aat lalais no la funsiona iha tempu neebe komunidade presiza.
Iha parte ketak Observador Politika, José Cortereal mos konsideira katak kazu nee hatudu diferensa signifikativu ho gastu Estadu nian neebe fakar barak liu ba sosa veikulu foun no bens estar kargu xefe sira nian, iha parte seluk povu iha baze kontinua dudu gerobak hodi lori moras ba klinika.
Enkuantu too notisias nee Media STL publika, parte Ministru Saude no autoridade saude iha Munisipiu ka Postu Administrativu refere seidauk fo esklaresimentu foun ruma konaba kronolojia loloos no lalaok manutensaun ambulansia iha area neeba.
(car)
