DILI, STLTIMORLESTE.com – Eskola balun iha Munisípiu Dili hahu halo konstrusaun dapur ba tein programa merenda eskolar ba estudantes sira.
Asuntu nee hatoo husi Superintendente Edukasaun Munisípiu Dili, Cesarina C. Guterres ba STL iha nia knaar fatin, Tersa nee (07/07/2026).
“Hanesan eskola EBF Camea Centru, maske dapur foun iha ona maibe sira nafatin uza ai sunu no sira tein iha liur no hahan tasak mak foin lori ba dapur foun. Tuir ami nia observasaun hanesan nee, maibe kontrusaun mai husi ME ou Estatal karik, tanba informasaun atu klaru liu tan, diak liu husu iha Diretor SEM Dili,” dehan nia.
Nia dehan, programa merenda eskolar iha eskola sira lao normal hanesan bai-bain, fornesedor sira tein tuir menu neebe mak husi eskola sira iha ona, tanba nee eskola balun tein merenda uza gas, maibe balun mak sei uza ai sunu, balun iha dapur no balun mak foin hahu halo konstruksaun.
Nunee mos Fundador Eskola Nobel da Paz, Jeremias P. de Jesus hatete, too agora estudantes sira husi ensinu baziku Nobel da Paz la asesu ba iha programa merenda eskolar inklui mos la hetan konsesaun eskolar, nee duni sira nian estudantes husi eskola refere la asesu merenda eskolar.
“Ami nian estudantes ensinu baziku Nobel da Paz la asesu merenda eskolar, tanba eskola Nobel hanesan eskola privadu ida, maibe atu fo apoiu ba eskola sira nee kompetensia husi Ministériu Edukasaun,” nia akresenta.
Iha parte ketak, Kordenador EBF Fatumeta, Jose Manuel Guterres hatete, ema nain lima mak tein ba estudantes sira han, tanba ema neebe mak tein nee mos depende ba hirak neebe iha ona konhesimentu atu tein, tanba tein nee dader too loraik, konaba estudantes sira han nee depende ba sira nian aula, tanba sira iha turnu tolu, primeiru turnu nee tama tuku hitu ho balun, tuku sanolu sai sira tenke simu kedas merenda, turnu segundu nian forma tama kedas aula, rua sai simu merenda, nunee turnu datolu nee tama fali, depois tuku tolu ho balun sira simu kedas hahan, tama fali aula sai tuku lima..
“Neebe laiha labarik ida atu halimar kleur, ita nian fornesedor sira uza gas no ai, ita nian estudantes sira mos konsumu aifuan nee mak hanesan hudi, aidila, apel, nomos pateka, aifuan sira nee estudantes sira han troka malu, laos han oin ida deit lae,” nia afirma.
Nia informa, ayam potong, sosis no ikan nee la tama iha menuIm, ita nian estudantes sira konsumu deit naan fresku no ikan fresku deit, tanba nee, ita labele uza fali ikan kulkas, ayam potong no sosis nee, nee duni sira la uza ida nee.
Nunee mos Antonio do Rego hanesan estudante dehan, fornesedor sira tein merenda eskolar uza ai sunu, dapur neebe tein merenda nee iha parte eskola nian kotuk no la besik sala aprendizajen, nunee mos fornesedor sira tein uza ai sunu no gas neebe mak iha para bele tein merenda eskolar ba estudantes sira.
“Fornesedor sira tein merenda eskolar uza ai sunu, dapur neebe tein merenda nee iha parte eskola nian kotuk no la besik sala aprendizajen, nunee mos fornesedor sira tein uza ai sunu no gas neebe mak iha para bele tein merenda eskolar ba amo estudantes sira,” nia akresenta.
Hatan ba asuntu nee Belchior Maria Almeida Barros hanesan Xefe Departamentu Programa Merenda Eskolar iha ME katak, Ministeriu Edukasaun (ME) rekonhese dapur neebe mak tein programa merenda eskolar iha eskola balun seidauk diak, ba oin presiza tau atensaun ba ida nee.
“Los katak, ita nian dapur neebe mak tein programa merenda eskolar nee iha fatin balun la favorese, tanba programa sira nee kuaze ita fo ona ba iha munisipiu mak tau osan, tanba kuaze munisipiu barak halo ona planu, tanba ME nian papel ba programa merenda eskolar nee iha rua deit, ida halo monitorizasaun, ida seluk mak halo avaliasaun no fiskalizasaun ba iha implementasaun merenda eskolar,” katak nia.
Nia dehan, konaba konstrusaun nee iha nibel munisipiu ida-idak mak sei halo, tanba liu husi programa PNDS neebe mak sei estabelese iha kada eskola sira, nee duni dapur merenda eskolar balun too agora seidauk diak, maibe balun diak, hodi forsedor sira tein merenda eskolar ba estudantes sira.
“Agora daudaun ami nian kordenador iha nee hela husi Baucau ninia, hanesan mos informasaun neebe mak mai husi Diretor Servisu Edukasaun Munisipiu Baucau informa mai katak, ho produsaun produtu lokal iha Munisipiu Baucau nee menus teb-tebes, dala barak ita nian implementador sira tenke hola produtu sira neebe mak laos mai hotu iha rai liur lae, balun sira tenke ba sosa iha loja,” katak nia.
Nia hatutan, ida nee mak informasaun neebe mak daudaun nee Diretor SEM Baucau aprejenta ona iha enkontru sira, neebe mak dehan los duni iha Munisipiu Baucau nee produsaun ba ai-haan lokal nee sei menus no la too, tanba merenda eskolar nee implementa kada semana loron lima, nee loro-loron.
(jac)
