BAUCAU, STLTIMORLESTE.com – Partidu politiku sira hanesan Kmanek Haburas Unidade Nasional Timor Oan (KHUNTO), Partidu Demokratiku (PD) no Partidu Libertasaun Popular (PLP) laiha sede permanente iha Munisipiu Baucau.
Diretor CNE Munisipiu Baucau, Esmeraldo Damião Belo informa, husi loron 02-03 Julhu nee CNE halao vizita ofisial ba sede partidu KHUNTO, PLP, PD no Kongresu Nasional Rekonstrusaun Timorense (CNRT-sigla português) no haree mos sede partidu Frente Revolusionaria Timor-Leste Independente (FRETILIN), iha neebe nota partidu KHUNTO, PLP no PD seidauk iha sede permanente, tanba durante eziste no estabelese estrutura iha Munisipiu Baucau, hanesan partidu KHUNTO aluga deit iha privadu utiliza ba sede enkuantu partidu PLP utiliza deit uma koordenador partidu iha nivel Munisipiu ba sede partidu Munisipal, enkuantu PD uza militante nia uma.
“Sede permanente neebe ami haree mak partidu FRETILIN maske ami seidauk vizita tuir fila fali mak CNRT, mais ba partidu tolu hanesan PLP uza fali koordenador nia uma, PD uza militante nia uma, KHUNTO aluga ema nia uma,” hateten Esmeraldo Damião Belo ba jornalista sira iha nia knaar fatin Vila Nova Baucau, Tersa (07/07/2026).
Nia esplika, vizita neebe CNE halao ba iha sede partidu sira lidera husi Prezidente CNE rasik no haree partidu sira neebe laiha sede permanente nee sei fo impaktu ba partidu iha futuru mai, tanba nee durante vizita CNE enkoraja estrutura partidu politika sira iha nivel Munisipiu neebe seidauk iha sede partidu tenke aprosima ho estrutura nasional haree kestaun refere, tanba sede partidu mak fatin ida akumula nia militante sira atu apredende edukasaun sivika.
Maibe durante vizita CNE nian ba partidu politiku iha Baucau neebe seidauk iha sede partidu permanente iha Baucau, parte CNE nasional rejistu ona no sei analiza atu fo sansaun.
“Iha sede aluger no uza militante nia uma, ida nee termu referensia ida neebe mak ita nia komisaria CNE sira sei estuda iha Nasional too tempu sei resposta,” Esmeraldo komenta.
Diretor CNE Munisipiu Baucau nee katak, durante vizita CNE nian ba sede partidu sira neebe seidauk iha sede permanente, parte CNE aviza ona ba estrutura Munisipal, atu koordena lalais ho parte estrutura nasional aloka orsamentu konstrui ona sede permanente no propriu tuir regras CNE nian.
Nia argumenta, seluk mak sede permanente husi partidu ida iha nivel Munisipiu nuudar kondisaun importante, atu nunee bainhira eleisaun Munisipal neebe tuir planu sei akontese iha tinan 2027 bele kompete.
(tom)
