AMBENO, STLTIMORLESTE.com – Prezidente Autoridade Turizmu no Ambiental, Virgilio Smith hamutuk ho Ekipa Ministeriu Turizmu no Ambiental (MTK) akompanha husi Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu ho Sekretariu Rejional sira, observa direitamente progresu Konstrusaun Hotel besik Monumentu Lifau, Otel Oeupu no Otel Fulolo.
Tuir Prezidente Autoridade Turizmu no Ambiental, Virgilio Simith ba STL iha Otel no Restaurante neebe konstrui husi Empreza internasional ida husi Xina konstrui Oel no fatin akomodasaun besik monument Lifau, besik Aeroportu Internasional Rota do Sandalow Oecusse, Segunda (06/07/2026) katak, konstrusaun hotel iha nee, investimentu privadu maibe oinsa bele apoiu setor turizmu bele dezenvolve, tanba ho infraestrutura sira nee maka sei atrai ema barak mai, signifika movimentu turizmu nee avansa.
“Hau hanoin laos fatin ida nee deit, maibe fatin sira neebe ita haree rekursus neebe potensial ba rekursu atu atrai ema mai vizita, ida nee sei dezenvolve, ezemplu ita nia tasi, ita nia foho, ita nia beleza natural, fatin istoriku, fatin kultura ninian hanesan Monumentu Lifau, fatin bulkaun iha Poto Oesilo nian, fatin turizmu relijiaun neebe kada tinan ema ba halo devosaun, ekoturizmu maka ita nia natureza, nee hotu infraestrutura dezenvolve, ema sei mai ba vizita fatin sira nee,” dehan Prezidente Autoridade Turizmu no Ambiental, Virgilio Smith.
Nia haktuir tan katak, husi fatin turizmu sira nee, sei fo benefisiu ba komunidade sira tanba ema ba vizita, sei sosa povu ninia produtu sira, tanba nee dezenvolve turizmu, dezenvolve sosiu ekonomiku komunidade ninian iha RAEOA.
Iha biban nee, Prezidente Autoridade RAEOA, Regio da Cruz Salu dehan, atividades vizita nee, atu haree setor investimentu neebe Autoridade RAEOA kontratu tempu naruk ho maluk investor estranjeiru sira iha Oecusse, nunee komprimenta sira atu nunee tinan oin, sei iha Eventu internasional ida iha Oecusse, liu-liu kongresu Internasional Edukasaun no Ambiental husi membru Komunidade Pais Lingua Portugues (CPLP) neebe Oecusse sei sai uma nain ba eventu nee, tanba nee maka ohin mai haree sira nia progressu konstrusaun Otel no restaurante iha Oecusse, atu nunee tinan oin, sira mos bele simu bainaka sira husi CPLP neebe maka mai Oecusse.
“Ami sei koordena ho sira, atu nunee fatin konstrusaun hotel no restaurante husi ita nia maluk investor estranjeiru sira iha Oecusse mos bele prepara kondisaun ba ita nia bainaka sira husi nasaun CPLP mai tuir Kongresu Internasional Edukasaun no Ambiente iha Oecusse tinan oin,” dehan nia.
Tuir observasaun STL, Prezidente Autoridade Turizmu no Ambiental, Virgilio Simith ho PA-RAEOA, vizita uluk Hotel no Restaurante iha Lifau, Kontinua vizita tan Hotel Oeupun neebe governu kontratu ho Kompanhia Seaguel Resort durante tinan 50 hodi investe iha setor Otel no Restaurante iha Oecusse. Hafoin ida nee, Prezidente Autoridade Turizmu no Ambiental, Virgilio Simith kontinua vizita investimentu estadu ba otel iha Fulolo, Suku Costa, Postu Administrativu Pantemakassar, atu nunee bele uza simu bainaka sira husi membru CPLP neebe tinan oin sei mai tuir Kongresu Internasional Edukasaun no Ambiente iha Oecusse.
(jos)
