DILI, STLTIMORLESTE.com – Bispu Dioseze Baukau, Dom Leandro Maria Alves hatete, Padre Joao de Vasconcelos Baptista Felgueiras, SJ nuudar aman espiritual ba ema hotu, basa ema neebe hasoru nia, liafuan primeiru neebe koalia mak Maromak nia domin, nia dada ema hotu hakbesik ba Maromak.
Dom Leandro hatete, Padre João Felgueiras ema neebe haraik aan tebes-tebes, simples, nia nunka atu mosu iha oin, maibe nia halao nia knaar sira iha Maromak nia laran no iha orasaun.
Dom Leandro hatete, haree ba ninia dedikasaun ba igreja no nasaun TL, tanba ema hotu agradese ba Maromak, tanba Amu João Filgueiras nia prezensa nuudar grasa boot Maromak nian, ida neebe Nai Maromak haraik ba igreja no nasaun TL.
“Padre João nuudar ita hotu nia aman espiritual, ema hotu konhese Padre nee, wainhira ita hasoru Padre João, primeriu neebe koalia mai ita mak Maromak nia domin, nia sempre dehan Maromak hadomi tebes-tebes o, nia husu ita atu reza hodi koalia ho Maromak, nia lori ema hotu atu hakbesik aan ba Maromak,” Dom Leandro Maria Alves hatoo mensajen ikus ba maktoban Padre João Felgueiras iha Se Katedral Dili, Tersa nee (7/07/2026).
Padre Joao Felgueiras haree nuudar aman edukasaun ninian, laos deit edukasaun formal, maibe edukasaun tomak oinsa husi nia fuan no hahalok sira halo ema bele aprende buat barak, nia hakarak Timor oan hetan edukasaun no hakarak Timor oan bele aprende eskola, nia buka maneira oin-oin atu tulun ema no tulun Timor oan hodi hetan matenek.
Padre João Felgueiras hatene katak so liu husi edukasaun ita bele dezenvolve Timor, nia mos sempre koalia mai ita hadomi malu, nia dehan Maromak hadomi imi, tanba nee imi mos buka hadomi malu.
Tanba buat hotu neebe Padre João halo ba Maromak nia Gloria, tan nee hahalok dak hotu neebe nia iha ba Kreda no nasaun Timor.
“Ita fiar katak oras nee Padre João hetan premiu iha Maromak nia reinu, Padre Joao iha Lalehan harohan ba Maromak mai ami,” hatete Dom Leandro.
Padre Joao Filgueiras mate iha loron 3 Julhu 2026, iha Dili Medical Center (DMC), tuku 17.30 OTL, ho idade 105.
Padre João Vasconcelos Baptista Filgueiras moris iha Caldas das Taipas, Portugál, iha loron 9 Junhu 1921.
Padre João tama Companhia de Jesus iha idade tinan 21 no simu ordenasaun saserdotál iha idade tinan 29.
Iha tinan 1971 mai Timor atu sai Vise Reitór Semináriu Dioseze Díli.
Nia hanorin lian português iha Externato São Jose no fó kontribuisaun boot ba formasaun intelektual Timoroan sira inklui antigu Primeiru Ministru, Rui Maria de Araújo.
Bainhira invazaun Indonezia hahu iha tinan 1975, Padre João deside hela nafatin iha Timor maske hasoru vijilansia husi autoridade Indonezia.
Iha tinan 2006 hamutuk ho José Alves Martins públika livru Nossas Memórias de Vida em Timor, neebe relata esperiensia no akontesimentu importante sira husi tinan 1975 too Timor Leste hetan independénsia.
Tanba ninia dedikasaun ba Timor Leste no Portugál, Padre João simu kondekorasaun importante barak, inklui Grande Ofisial Ordem da Liberdade (2002), Insígnia Ordem de Timor Leste (2009) no Grã-Cruz da Ordem de Camões (2022).
(joa)
