DILI, STLTIMORLESTE.com – Uma kreda no sarani Timor Leste (TL) lakon Nailulik Santo domin nain, Padre Joao de Vasconcelos Baptista Felgueiras, SJ neebe dedika nia aan tomak ba rai doben Timor.
“Ita lakon Nailulik Santo ida, aman domin nain ida fuan boot tebes ba ema no kreda Timor, molok atu husik Padre João Filgueiras, nuudar Timor konvida ema hotu hasae dadoli kmanek ba nia futar tulun, nia bele latan daudaun iha ita futar matan,” hatete Arsebispu Arkedioseze Metropolitana Dili, Dom Virgilio Cardeal do Carmo da Silva, SDB liu husi nia omilia, wainhira prezide misa funebre ba Padre João Felgueiras iha Se Katedral Dili.
Bibi atan diak lao sai daudaun, lao husi rai Timor sae ba leten aas, horik fatin rohan laek, husik hela todan sira iha fatuk murak no iha duut matak sira.
“Ita lia fuan sai roman ba Timor oan no beiaon sira klamar Santa lao ba ho damen ba hasoru Nai Santo liu hotu atan diak no fiel soi ba kroa gloria nia iha horik fatin Lalehan, harohan ba ami hotu ita oan ita ema be ita hadomi,” hatete Dom Virgilio.
Bibi Atan Uma Kreda haktuir, dadoli ida nee mai husi fuan Timor nian lisan diak neebe beiala sira husik hela, hanorin katak molok atu husik katuas ida neebe hadomi, husu nia ho dadoli husi fuan maibe nakonu ho gratidaun ba Maromak, tanba haraik mai Timor prezensa naruk husi nia murak ba Padre João Felgueiras.
Bibi atan diak Padre Joao Felgueiras lao daudaun ba fatin ikus iha reinu Lalehan.
Tan nee lirika husi dadoli nee iha relasaun no espresaun iha evanjelhu São João neebe koalia kona ba Jesus nia domin ba nia emar sira, nia hadomi ema iha mundu hadomi too rohan.
Padre João Felgueiras moris ona tinan naruk hahú husi sama ain iha Timor 1971, nia konsidera reinu nee laos fila ba pasajen ida ba ninia misaun, nuudar misionariu Jesuita maibe sai nia horik fatin metin hodi servi too mate iha rai ida nee.
Padre João Felgueiras mai laos atu fila fali, maibe nia mai atu hela no hakoi iha rai ida nee, nia halo Timor oan sai nuudar nia ema sira neebe nia hadomi, tau matan ho nia hanorin.
Dom Virgilio hatete, iha altar Santo nia oin maktoban Nailulik neebe moris ona tinan naruk oras nee ba nia la hakerek deit iha sura tahan orasaun nian, maibe sai ida deit ho nia.
Padre João halo nia fuan hola isin iha ninia moris, istoria nuudar Nai Lulik misionariu no Jesuita ida nia hasae buat hotu neebe iha ba Maromak ninia Juventude matenek, liberdade fo hotu nia moris ba Timor, nia hamutuk ho Timor iha terus haksolok nia laran, iha susar funu no haksolok ukun aan nia tanis no hamlaha hamutuk ho ita iha terus.
Padre João Felgueiras mate iha loron 03 Julhu 2026, iha Dili Medical Centre (DMC), ho idade 105.
Padre João Felgueiras moris iha Caldas da Taipas Portugal iha loron 9 Junhu 1921, nia tama iha Timor iha tinan 1971.
(joa)
