DILI, STLTIMORLESTE.com – Inspetores sira iha Munisípiu Lautem iha transporte motorizada, hodi bele uza halao servisu, tanba kada loron sira iha deit iha eskola.
Tuir Direitor Servisu Eduksaun Munisipiu Lautem, Anibal Fernandes katak, inspetores sira nee halo servisu uza motorizada, no kada loron sira iha deit eskola ho mentor sira nomos inspetor eskolar, depois sira mos hamutuk ho sira, hodi bele rezolve problema balun neebe mak iha eskola, nee duni sira nian transporte motor neebe sira uza ba halo servisu nee diak hela, laiha problema.
“Dezafiu neebe mak ita infrenta mak konaba parte insfraesturtura eskola nian, maibe ida nee balun ita komesa hadia dadaun ona, balun mak seidauk, maibe ida nee dezafiu ida. Dezafiu seluk mak oinsa ita nian estudantes sira bele aprende diak liu tan ho material neebe sufisiente, para sira bele aprende,” dehan Diretor Servisu Eduksaun Munisipiu Lautem, Anibal Fernandes ba STL liu husi telefone, Kuarta nee (08/07/2026).
Nia dehan, inspetor hamutuk ho superintendente hamutuk nain sanolu, inspetor ba pre eskolar nian rua, ensinu baziku nian hitu, nee duni pre eskolar nian rua, ensinu baziku no sekundariu nian mak hamutuk hitu, depois maka koloka ba kada area neebe mak iha ona, tanba Inspektores sira nee kada loron iha eskola deit.
“Ami nian inspektores nain sia nee halo sira nian servisu diak, tanba ho fasilidade neebe sira iha, sira uza ida nee hodi halo servisu, tama no sai iha ita nian eskola sira, liu-liu hodi haree atividades neebe lao iha ita nian eskola sira, nee duni konaba transporte ba ita nian inspektores sira laiha problema, nain sia nee uza motor mak halo sira nian servisu kada loron iha eskola sira neebe lokaliza iha Munisípiu Lautem,” tenik nia.
Nia hatete, eskola sira area remotas nee ho distansia neebe dok, maibe ho transporte neebe inspektor sira iha, nee sira bele tama no sai ba iha eskola sira nee, tanba motorizada neebe iha, bele fasilita sira halo sira nian servisu iha terenu.
Nunee mos Miguel Freitas, hanesan Direitor Servisu Eduksaun Munisipiu Bobonaro hatete, inspetor eskolar sira iha Munisípiu Bobonaro sira iha transporte hanesan motor, neebe bele ajuda sira nian servisu, hanesan halo monitoring ba iha eskola sira, tanba liu husi monitoring neebe sira halo, hodi identifika dezafiu neebe mak eskola sira hasoru.
(jac)
