DILI, STLTIMORLESTE.com – Estudantes husi Eskola Baziku Central (EBC) Manleuana, prepara aan hodi hein ezame segundu periodu, neebe sei halao iha loron 13 semana oin.
Informasaun nee hatoo husi Diretor EBC, Manleuana, Carlos Correia ba STL iha nia knaar fatin, Kuarta nee (08/07/2026).
“Hau hanoin konaba ezame segundu periodu nian, daudaun ami halo hela preparasaun, tanba iha nee ami forma komisaun, nee duni oras nee daudaun buat hotu preparadu, hela deit prepara sala, ho nunee Segunda ami halao ona ezame. Sala de aula nee reabilitasaun hela, tanba sala tolu nee aat, agora ami sei hadia hela,” dehan nia.
Tuir Carlos, daudaun nee sala tolu mak sei iha faze konstrusaun hela, maibe sala neebe estudantes sira uza ba ezame nee sufisiente, tanba nee sira sei uza sala 12 no estudante hamutuk 800 resin, neebe mak sei tuir ezame iha Segunda nee, ami nian meza no kadeira sufisiente ba ami nian estudantes sira.
“Ami kria ona komisaun ba ezame ninia, tanba molok ami atu tama ba iha ezame nee, ami kria ona komisaun, ami rua adjuntu konvoka enkontru ho ita nian profesores sira atu nunee bele realiza ezame nee bele lao ho diak. Ita nian estudantes husi filial nee halao deit avaliasaun kontinua, sira laiha ezame, husi sentru mak halao ezame,” nia informa.
Nia dehan, konaba konsesaun eskolar nee sei hein hela husi filial tolu, depois sei halo hela planu, tanba TPO iha tiha ona, bainhira osan nee sai para sira bele halo levantamentu, durante nee sira ezekuta osan ida nee tuir nesesidade eskola nian, tanba konsesaun nee kada estudantes ida US$ 2.
(jac)
