DILI, STLTIMORLESTE.com – Prezidente Republika (PR), Jose Ramos Horta husu trabalhador Timor oan neebe halao servisu iha Australia ho disiplina, respeita ema nia kultura no aprende esperiensia, nunee bele implementa fali iha rai laran.
Prezidente Republika, Jose Ramos Horta hatoo lia hirak nee liu husi nia diskursu, bainhira halo despedida ho trabalhador Timor oan neebe sei halao servisu iha Australia, iha Hotel Palm, Kampu Alor, Kuarta (08/07/2026).
PR hatete, trabalhador ba servisu iha Australia, maske servisu todan maibe servisu ho disiplina, respeita ema nia kultura no sira nia lei, komportamentu diak selu mos tuir ida nee, ba Australia mos nunee, servisu ho displina nafatin.
Prezidente dehan, ba manan esperiensia servisu ho displina no etika, laos manan osan deit maibe buka aprende mos ho esperiensia.
“Servisu rai osan loron ruma o iha esperiensia fila, portantu trabalhador ita nia iha mundu Australia, Korea do Sul lubuk ida iha Inglaterra, maibe iha Inglaterra programa seluk ona, rihun ba rihun ba tanba pasaporte Português no lubuk ida mos ilegal,” katak Prezidente Republika.
Aleinde nee, ba jornalista sira Prezidente hatete, programa haruka Timor oan ba servisu iha Australia, programa nee diak tebes, Timor oan rihun ba hamutuk ona dezde programa nee hahu 2025 mak ba Australia fila ba mai asina kontratu komforme asina kontratu programa nee sei kontinua bele aumenta tan ajuda familia nee prioridade numeru um, ajuda sira nia familia hadia sira nia moris, segundu hadia tebes ekonomia Timor, osan lubuk mak tama Prezidente apoiu 100%.
Prezidente Republika hatete, traballu imigrante iha liur iha Australia, Eropa, Amerika, serbisu todan sakrifisiu hanoin deit ba sira nia familia familia neebe sira husik hela iha moris fatin, loron loron sira nia preokupasaun mak ba sira nia familia.
“Ita nia trabalhador iha liur kontribui makaas los ona laos deit ba Familia tanba osan tama iha nee familia mos presiza gasta osan ba loza entau ajuda ekonomia mos book aan iha rai laran, nee duni Sekretariu Estadu SEFOPE tinan 3 nia laran serbisu diak tebes dinamiza ho programa nee ho Australia no Korea do sul japaun no rai seluk tan,” dehan Prezidente.
Prezidente Republika hatete, nia koalia ho ema barak iha Australia, maibe sira kontente ho Traballador husi Timor oan, buat ida neebe Prezidente rona husi kompanha sira husi Australia katak trabalhador Timor oan serbisu ho rapido kompara ho trabalhador husi nasaun seluk.
Nunee mos Reprezentante Embaixador Australia ba Timor Leste, Edward Milkinson hatutan, privilejiu ida atu hamutuk ho trabalhador sira iha serimonia despedida importante ida-nee. Ohin momentu orgullu ida. Ida nee marka signifikativu ba traballador sira atu hahu sira nia viajen ba Australia, no mos ba familia neebe apoia ona sira iha jornada ida nee.
“Ba traballador sira, parabens hetan selesaun ba eskema PALM nuudar konkista signifikativu ida. Prosesu nee kompetitivu, no imi nia susesu reflete imi nia servisu makaas, abilidade, determinasaun, reziliensia no prontidaun atu reprezenta Timor-Leste iha rai liur. Ita-boot hotu tenke orgullu ho saida maka ita-boot realiza ona,” dehan nia.
Nia hatutan, Australia valoriza tebes parseria ho Timor Leste, mobilidade laboral sai hanesan ezemplu diak liu no pratika husi parseria iha asaun.
Nia dehan, mobilidade laboral hetan susesu tanba trabalhador sira nia apoiu, enkorajamentu no sakrifisiu. Enkuantu traballador sira halo viajen ba Australia, família sira nafatin sai nudar fuan iha viajen ida nee. trablahador nia kontribuisaun hetan rekonesimentu, valorizasaun no apresiasaun klean.
“Ikus liu ba traballador sira, aproveita oportunidade ida-nee ho diak. Serbisu makaas, aprende abilidade foun, harii amizade foun no iha orgullu sai nudar embaixador ida ba Timor-Leste, Ita-boot hamutuk ho komunidade traballador timoroan rihun ba rihun neebe halo ona kontribuisaun boot iha Australia tomak no hametin lasu entre ita-nia nasaun rua,” katak nia.
Nia hatutan, Australia sei simu Timor oan ho laran nakloke, hein atu aprende hosi hamutuk, hosi esperiensia sira iha Australia no Timor Leste nia. Lori Australia nia naran, dezeja susesu hotu iha viajen furak ida nee.
(eme)
