DILI, STLTIMORLESTE.com – Komunidade sira neebe hela iha area rurais, balun labele asesu bá saude ho diak, tanba distansia husi uma mai Postu Saude neebe dok.
Tuir Xefe Suku Baboi Kraik, Postu Administrativu Atsabe, Luis Fernandes hatete, komunidade barak husi Postu Atsabe barak mak la asesu bá saude ho diak bainhira sira senti moras iha isin lolon. Problema neebe difikulta sira mak distansia no kondisaun dalan neebe aat halo komunidade barak mak la konsege mai halo konsulta iha postu saude neebe iha. Neebe bainhira sira senti moras isin manas, mear no ulun moras ruma labele mai konsulta.
“Sira iha deit uma, nono no hemu deit aimoruk tradisional sira neebe sira halo hodi hemu. Neebe dala ruma moras nee sira husik deit too kleur i dala ruma grave tiha mak haruka familia lori sentru saude. Neebe distansia no dalan neemak dala ruma difikulta sira atu mai konsulta bá sira nia moras,” dehan nia bá STL via telefone, Kuarta (08/07/2026).
Nia hatutan, haree bá situasaun sira nee halo povu kiik sira labele asesu bá saude ho iwak, tanba nee husu bá governu atu harii tan postu saude sira iha postu sira nomos suku neebe iha area rurais.
Nunee mos sidadaun Agusta Soares hatete, kondisaun dalan ho distansia neemak dala ruma halo komunidade sira neebe hela iha area rurais labele mai halo konsulta bá sira nia moras. Dala ruma akontese too moras nee naruk i kondisaun grave mak familia foin lori mai iha postu saude. Bainhira Postu Saude sira labele halo tndementu tanba kestaun rekursu no ekipamentu, entaun transfere kedas mai ospital nasional Díli.
Nia afirma, neebe haree bá kondisaun sira nee, governu tenke haree no hadia problema sira nee. Atu nunee povu kiik sira bele asesu ho diak, labele husik povu sira moris iha susar ho terus nia laran.
(dom)
