DILI, STLTIMORLESTE.com – Tribunal Judisial Primeira Instansia Suai (TJPIS) iha loron Kuarta (08/07/2026) liu husi despaisu ikus ba prosesu primeiru interogatoriu, deside aplika medida Koasaun Prizaun Preventiva ba arguidu nain rua (2) ho inisial L no WZ hanesan sidadaun Xineza.
Arguidu nain rua submete mai iha Tribunal, husi parte Ministeriu Publiku (MP) promove ho krime Moeda Falsu neebe previstu iha artigu 308 husi Kodigu Penal Timor Leste nian.
Depois halo tiha identifikasaun ba arguidu nain rua, iha alegasaun husi parte Ministeriu Publiku neebe reprezenta husi Prokurador Alfonso Lopez, husu Tribunal atu aplika medida Prizaun Preventiva ba arguidu nain rua.
Enkuantu husi parte defeza nian, neebe reprezenta husi Defensor Publiku Jonas Henrique, husu Tribunal atu aplika medida neebe adekuadu ba arguidu nain rua.
Rona tiha alegasaun, ikus mai Juiz deside aplika medida Prizaun Preventiva (PP) ba arguidu nain rua.
“Tribunal deside aplika medida Prizaun Preventiva ba arguidu nain rua, hanesan defeza sei haree depois mak deside atu halo rekursu,” dehan Defeza Jonas Henrique ba STL via telefone iha Kuarta loraik nee.
Tuir Jonas, Tribunal deside aplika medida Prizaun Preventiva ba arguidu nain rua, tanba haree ba arguidu nain rua hanesan sidadaun Xineza, hodi asegura sira ba iha prosesu investigasaun. Maibe hanesan defeza sei haree hodi halo rekursu ba despaisu Tribunal nian.
Nia esplika, hafoin despaisu Tribunal nian sai, arguidu nain rua lori kedan ba iha Prizaun Suai, tanba kazu refere akontese iha area Juridisaun Suai nian.
Nunee tuir regra, prosesu primeiru interogatoriu se Tribunal aplika despaisu ruma parte sira la konkorda bele liu husi sira nia defeza halo rekursu ba iha Tribunal Rekursu (TR), tuir prazu loron 30 nia laran, sura husi loron neebe simu notifikasaun despaisu husi Tribunal.
Prosesu primeiru interogatoriu nee prezide husi Juiz Samuel Paixeco, Ministeriu Publiku reprezenta husi Prokurador Alfonso Lopez, arguidu nain rua hetan asistensia legal husi Defensor Publiku, Jonas Henrique.
(ter)
