DILI, STLTIMORLESTE.com – Relasiona ho subvensaun públika neebe mak Ministériu Ensinu Superior Siensia no Kultura (MESSK) atribui ba ensinu superior privadu sira iha rai laran, maibe too ohin loron sira seidauk submete relatóriu ba ministériu refere.
Kestaun nee hatoo husi Domingos Barros hanesan Diretor Jeral Ensinu Superior no Siensia ba STL, Kinta nee (09/07/2026).
Nia dehan, MESSK atribui ona subvensaun públika ba ensinu superior privadu sira iha rai laran, maibe fo uluk 50%, bainhira sira ezekuta hotu ida nee, hatoo fali relatóriu mai MESSK, para atribui ba etapa segundu nian ba sira, tanba agora daudaun etapa primeiru nian nee ensinu superior sira seidauk hatama relatóriu mai ministeriu.
“Konaba subvensaun publiku ba universidade privadu sira, ministeriu atribui ona 50% ba etapa primeiru nian ba ensinu superior sira, maibe sira seidauk hatoo relatoriu mai ministeriu. Depois relatoriu mai mak ita foin atribui segundu etapa. ECTI troka ona naran ba ESEIK tanba entrega ona ba governu hanesan instituisaun públiku ona,” nia esplika.
Iha fatin la hanesan, Reitor DIT, Salustiano dos Reis Piedade hatete, governu liu husi MESSK nafatin fo apoiu subvensaun ba Instituisaun Ensinu Superior sira iha rai laran, atu nunee bele hadia kualidade iha ensinu superior, liga ba subvensaun públika nian, nee sira sei ezekuta tuir nesesidade institutu ninia.
“Ita nian governu liu husi MESSK nafatin fo apoiu subvensaun ba Instituisaun Ensinu Superior sira iha rai laran, atu nunee bele hadia kualidade iha ensinu superior, liga ba subvensaun públika nian, nee sira sei ezekuta tuir nesesidade institutu ninia,” nia komenta.
Reitor Instituto Ciensia Saude (ICS), Leao Borges hatete, Instituto Ciensia Saude (ICS) simu ona subvensaun 50% husi Ministeriu Ensinu Superior Ciensia no Kultura (MESSK), no daudaun nee hahu ezekuta, sei tau prioridade ba asuntu haat.
“Ami simu tiha ona subvensaun nee 50%, daudaun ninia ezekusaun nee lao hela, bainhira ninia ezekusaun nee remata mak sei submete relatóriu, depois mak sei simu tan faze segundu nian ba 50%, subvensaun nee ami foin simu iha fulan Maiu nia laran, nee duni daudaun nee ICS foin mak ezekuta hela subvensaun ida nee,” nia komenta.
Nia dehan, subvensaun ida nee sei tau priodade ba iha asuntu haat mak hanesan apoiu estudantes, dosentes, nomos sei tau prioridade ba iha asuntu sira seluk tan, bainhira halo relatóriu mak sei husu tan 50% nee.
(jac)
