DILI, STLTIMORLESTE.com – Ministeriu Ensinu Superior Siensia no Kultura (MESSK) simu ona lista finalista neebe atu halo gradusaun husi ensinu superior tolu, inklui UNTL neebe realiza tiha ona serimonia gradusaun.
Lia hirak nee hatoo husi Diretor Jeral Ensino Superior no Siensia, Domingos Barros ba jornalista STL iha nia knaarfatin, Kinta nee (09/07/2026).
“Sobre lista finalista sira ba graduasaun UNTL mak primeiru periodu foin remata, sira seluk pedidu foin mak mai ministeriu, agora UNITAL mak update ona, hau hanoin ita nian ensinu superior seluk sei iha faze tuir mai. Konaba ICS mos pedidu tama ona, agora ekipa halo hela validasaun ba lista sira nee. Pedidu foin tama nee husi universidade tolu mak hanesan ohin hau temi nee, la inklui UNTL tama foin hotu,” nia akresenta.
Iha fatin seluk, Reitor Instituto Ciensia Saude (ICS), Leao Borges hatete, lista finalista nee hatama ona iha semana liu ba, nee duni agora daudaun husi parte ICS sei hein fali resposta husi MESSK, para bele halao gradusaun ba finalista neebe remata ona sira nian estudu iha ICS, maibe konaba preparasaun ba gradusaun ninia, nee preparadu ona.
“Ami nian lista finalista neebe remata estudu, no tinan nee sei halao gradusaun nee ami submete ona ba iha MESSK, ami submete lista nee iha semana kotuk, maibe seidauk iha resposta husi parte MESSK nian, tanba nee ami hein resposta husi ministeriu refere, tanba bainhira hetan resposta mak foin bele halao serimonia graduasaun. Ami nian finalista sira nee hamutuk 800 resin,” dehan nia.
Nia dehan, ezekusaun ba subvensaun públika nee sei lao hela, seidauk remata, agora atinji ona pursentu hira, nee tanba relatóriu mos seidauk iha nee, tanba nee daudaun ezekusaun ba subvensaun públika lao hela.
“Ami nian finalista 800 resin nee kompostu husi departamentu lima mak hanesan, departamentu infarmajen, parteira, farmacia, laboratoriu no ida seluk tan, ami nian preparasaun ba serimonia graduasaun nee lao ona, kuandu hetan resposta ona mak ami bele buka fatin, para bele halo orariu ba graduasaun ninia, tanba ami kria ona komisaun organizadora hahu preparadu ona,” katak nia.
(jac)
