DILI, STLTIMORLESTE.com – Ensinu Baziku Central (EBC) Manleuana nafatin halo kontrola ba profesores sira, no profesores sempre halo planu de aula nomos mantein kumpri orariu hanorin.
“Hau hanoin ami nafatin halo kontrola ba ami nian profesores sira, halo kontrolu ba ita nian profesores sira nee adjuntu nian, agora hau nian nee halo kontrola jeral, maibe ami nian profesores sira durante nee tama sedu eskola, hodi halao ensinu aprendizajen ba ita nian estudantes sira,” dehan Direitor EBC Manleuana, Carlos Correia ba STL iha nia knaar fatin, Kinta nee (09/07/2026).
Carlos informa liu tan, konaba planu de aula, nuudar profesores sira sempre halo planu de aula molok atu halo aprendizajen ba estudantes sira iha sala, tanba buat ida planu de aula profesores sira presiza halo duni, durante nee profesores sira kumpri orariu hanorin nian neebe mak iha ona.
“Ita nian eskola ida-idak iha nia regulamentu, oinsa ita hotu mantein kumpri regulamentu ida nee, durante nee karik ita nian profesores sira moras ou iha asuntu importante ruma, nee fo informasaun mai iha eskola para bele hatene,” dehan Carlos.
Iha fatin seluk, Diretor Eskola Sekundariu Jeral nu. 4 Setembru Balide, Sergio A. da Cruz dehan, Eskola Sekundáriu Jeral nu. 4 Setembru Balide kada loron sempre halo kontrola ba profesores sira, karik la halo planu de aula mak parte eskola halo relatóriu ba Ministériu Eduksaun (ME).
“Bainhira ita nian profesores sira dader tama tarde eskola, nee lista prezensa mak kontrola sira. Sira la halo planu de aula, nee husi parte eskola hatoo informasaun ba inspesaun no eduksaun munisípiu, los duni sira halo, tanba nee eskola sempre halo kontrola ba ita nian profesotes sira,” nia haktuir.
Sergio dehan, kada loron profesores sira tenke halo planu de aula hafoin sira bele halo prosesu aprendizajen ba estudantes sira, agora bainhira sira la kumpri mak eskola sei halo relatóriu hodi bele hatoo ba parte eduksaun munisípiu no nasional.
(jac)
