DILI, STLTIMORLESTE.com – Polisia Nasionál Timor Leste (PNTL) liu husi Diresaun Servisu Investigasaun Kriminál (DSIK) detein sidadaun nain 53 neebe prátika krime ilísitu online Scaming Call Center, PNTL sei aprezenta ba Ministeriu Publiku (MP).
“Prosedimentu legal sira neebe mak ita halo ba sidadaun sira nee mak halo identifikasaun normal no sira agora daudaun detein hela iha sela detensaun Dom Aleixo nian durante 72 de tempu, ami sei aprezenta ba Ministeriu Publiku hodi prosesa ba Tribunál,” hatete Diretór Servisu Investigasaun Kriminál, Superintendente Xefe Polísia Joao Belo dos Reis ba jornalista sira liu husi konferensia imprensia iha Komando Jeral PNTL, Kinta (09/07/2026).
Nia esplika, suspeitu sira nee maioria mai ho viza turista. “Maibe ita sei halo identifikasaun klean liu tan para bele hatene maizumenus sira neebe overstay ona karik balun keta halo violasaun ruma ita sei identifika ba iha neeba,” nia dehan.
João Belo informa, sidadaun estranjeiru sira PNTL asegura no detein iha fatin neebe diferente iha kuarta (08/72026), porvolta 12:00, Diresaun Servisu Investigasaun Kriminal detein sidadaun estranjeiru Xineza nain 29 no Kambodianu nain 2.
Nunee PNTL deteta katak, uma ida neebe sidadaun nain 29 aluga iha area Maneleuna, Aldeia Lamkari, Suku Manleuana nee suspetadu ba prátika krime Scaming Online, tanba bainhira polísia halo pasa revista ba uma nee sidadaun nain 29 halo duni atividade ilísitu ba jogu online krime.
Nia informa, PNTL halo autoriza ba uma nain neebe fo aluga uma ba sidadaun estranjeiru hodi halo pasa revista no deteta duni katak estranjeiru sira nee prátika duni atividade referida, nunee polísia sobu no haraun fatin sira neebe deskonfia sidadaun sira nee balun subar aan ba hodi halo atividade nee inklui mos asegura sasan sira neebe sira uza halo atividade nee.
Diretor Servisu Investigasaun Kriminál hatutan, horiseik PNTL deteta uma iha Maneleuna, Aldeia Lemokari Dom Aleixo nian neebe suspeita ba iha atividade ilegal nian.
“Nunee Servisu Investigasaun Kriminál ba iha fatin neebe halo intervensaun no deteta katak, sidadaun xineza hamutuk 29 ho sidadaun Kambodia nain 2 neebe halo hela sira nia atividade Scaming nian neebe identifika mos online game iha fatin neeba,” nia hatutan.
Nia informa, hafoin pasa revista ba estranjeiru sira nee polísia kaptura sira no lori mai Diresaun Nasionál Investigasaun Kriminál.
“Evidensia sira neebe mak ita iha, telefone hamutuk 60, tablet samsung 2, reuter 3, komputador laptop hamutuk 32, osan cash hamutuk $ 5.632 no pasaporte neebe ita asegura 29 kompletu”, nia relata.
Entretantu sidadaun estranjeiru nain 29 PNTL detein rejista ona iha Ministeriu Publiku ho NUK 0240/26.PNSIK.
(jen)
