DILI, STLTIMORLESTE.com – Polisia Nasional Timor Leste (PNTL) liu husi Diresaun Servisu Investigasaun Kriminál (DSIK) deteta tan sidadaun Xineza sira neebe involve atividade Scaming Call Center iha Metiaut.
Diretór Servisu Investigasaun Kriminál, Superintendente Xefe Polísia Joao Belo dos Reis hateten, iha Kinta nee PNTL halo hela operasaun no operasaun lao hela iha parte Metiaut.
“Ita detekta ona sidadaun Xineza hamutuk 24 daudaun iha ona DSIK, no nain 19 prosesa trasportasaunn mai DSIK, sira nee halo atividade Scaming call Center,” hatete Diretór Servisu Investigasaun Kriminál, Superintendente Xefe Polísia Joao Belo dos Reis ba jornalista sira iha Komando Jeral PNTL, Kinta (09/07/2026).
Nia dehan, sidadaun sira nee halo atividade hanesan, tanba polísia identifika liu husi materia neebe sira uza, fatin neebe sira uza no modus operandi neebe hanesan.
Nia dehan, PNTL halo hotu identifikasaun ba uma nain. “Mensajen husi PNTL ba uma nain hotu-hotu, sidadaun hotu-hotu neebe nia uma fo aluga ba ema karik atu kuidadu didiak tanba dala ruma ema estranjeiru sira uza fali uma privadu neebe sira aluga ba iha atividade call Center”, nia informa.
Nia deklara, agora daudaun Polísia halo hela parseiru internasionál Austrália no Indonezia, nomos nasaun sira seluk ho esperiénsia hanesan para ajuda Polísia hodi rekolha halo investigasaun klean ba asuntu nee.
“Ita servisu makaas hela atu deteta sira-nia movimentu, tanba balun eskapa sai ona husi fatin neebe bainhira ita halo intervensaun inklui ita fo ona informasaun ba servisu Migrasaun para deteta sira, bainhira sira halai sai husi ita nia teritoriu Timor Leste”, nia subliña.
Nia informa, agora daudaun Diresaun Servisu Investigasaun Kriminal ho Servisu Migrsaun halo hela koordenasaun servisu lao diak tebe-tebes, komunikasaun lao diak tebe-tebes, buat hotu-hotu neebe mak hetan falha ruma identifika erru ruma komunika ba sira para sira halo atuasaun.
“Atu informa mos katak PNTL liu husi Diresaun Investigasaun Kriminál reafirma ami nia kompromisu atu kombate Krime ho tipu transnasional, krime organizadu, krime sibernetika, mezmu ke ho limitasaun oin oin neebe ita infrenta, maibe reafirma katak, ita sei la fo fatin ba krime organizadu sira lao iha ita nian nasaun”, nia afirma.
Observasaun STL nian iha terenu katak, PNTL liu husi DSIK kaptura tan sidadaun Xineza hamutuk nain 19 husi numeru feto nain lima (5) neebe involve atividade Scaming call Center iha Metiaut, wainhira polisia halao kapturasaun iha fatin refere, balun halai hodi sae moru no haksuit tun rezulta balun ain kanek no liman kanek.
(jen)
