DILI, STLTIMORLESTE.com – Antigu Deputadu Husi Bankada Partidu Sosial Demokrata (PSD), Leandro Isaac kestiona makaas lideransa nasional sira relasiona ho prezensa atividade jogu online ilegal husi sidadaun estranjeiru (Xina), neebe daudaun nee transforma kapital Dili sai nuudar knuuk ba negosiu ilegal refere.
Leandro Isaac afirma katak, lideransa nasional sira mak iha responsabilidade prinsipal atu fo orientasaun hodi kombate atividade nee, maibe too agora seidauk hatudu asaun real hodi kombate atividade nee. Tuir nia, iha tempu neebe povu hasoru terus boot, lider sira falta inisiativa hodi salva rai nee husi impaktu negativu atividade ilegal.
Iha nia komentariu, Antigu Deputadu nee kritika postura elite sira nian neebe nia deskreve nuudar interese partikular, iha neeba sira ho fasil deit halo negosiasaun hodi hetan benefisiu privadu.
“Ita fo aan ba mate, sira basa liman, hamnasa, no ikus mai sira mak sai heroi neebe salvaguarda situasaun,” dehan Leandro Isaac ba STL, iha nia rezidensia Dili, Sesta nee (10/07/2026).
Nia hatutan katak, povu iha kraik mak sente terus boot liu no “ lambe masin midar” ona iha situasaun hirak nee. Leandro fo avizu ba populasaun atu labele monu tan ba rai kuak neebe hanesan, no husu atu iha konsensia nasional hodi proteje soberania rai laran.
Atividade jogu online ilegal neebe envolve estranjeiru iha Timor-Leste sai ona kestaun debate nasional, tanba konsideira hamosu risku ba seguransa publiku, dignidade estadu, no mos sai fator ida neebe kontribui ba kriminal organizadu iha kapital Dili.
Iha parte ketak Akademista UNTL, Daniel Sarmento hatoo katak atividade jogu online ilegal nee laos deit kestaun seguransa, maibe mos degradasaun valor sosial iha nasaun. Tuir nia Governu tenke foti medidas preventivas no edukativas makas, tanba kriminal organizadu hanesan nee bele estraga futuru jerasaun foun sira nian, liuliu sira neebe fasil atu monu ba influensia teknolojia neebe la kontroladu.
Entretantu iha loron hirak nee, imajen no video sira neebe hatudu Polisia Nasional Timor Leste liuhusi Diresaun Servisu Investigasaun Krimina (DSIK) kaptura sidadaun estranjeiru, liuliu sidadaun Xina sira neebe involve iha jogu online ilegal iha Dili laran, sai viral makas iha media sosial hanesan Facebook no TiTtok. Publikasaun sira nee hetan atensaun boot husi publiku, neebe hatoo kritika no preokupasaun konaba oinsa fasilmente sidadin estranjeiru sira nee bele halao atividade ilegal iha rai laran, hodi hamosu debate publiku neebe boot konaba kontrolu migrasaun no integridade Estadu nian.
(car)
