DILI, STLTIMORLESTE.com – Eskola Hotelaria no Turizmu Becora too agora seidauk iha laboratoriu ba departamentu teknolojia multimedia, maibe eskola garante iha tempu besik Ministeriu Edukasaun sei fo apoiu ba eskola refere.
Lia hirak nee hatoo husi Diretor Eskola Hotelaria no Turizmu Bekora, Charles F. Guterres ba STL iha nia knaar fatin, Sesta nee (10/07/2026).
“Konaba fasilidade nee mak ita iha laboratoriu, biblioteka, maibe ba ita nian teknolojia multimedia nee mak ita seidauk iha, maibe espera katak iha tempu besik husi parte ME bele establese ekipamentus sira nee, tanba komputador nee seidauk iha, maibe tempu badak komputador 30 sei mai, nee husi eduksaun mak atu fo ajuda,” nia deklara.
Tuir nia, daudaun nee estudantes sira halo pratika, nee uza rasik sira nian laptop, estudantes sira halo pratika, nee kada semana, nee depende ba materia multimedia nee, kuandu materia nee iha sira lori, bainhira laiha nee sira tuir fali aula hanesan baibain, daudaun nee profesores hamutuk 33, maibe ba area produtivu nee iha 15, profesores sira nee seidauk sufisiente.
“Ami nian profesores sira nee seidauk sufisente, tanba ami nian profesores balun neebe mak agora daudaun idade tama ba reforma ninia nee mak ami nian profesores sira seidauk sufisiente, nee duni ami sei presiza tan profesores, liu-liu profesores ba area produtivu ninia, nee importante tebes,” katak nia.
Nia hatutan, ba oin sira sei presiza tan profesores 10 resin ou 15, tanba ita nian politika ministeriu nian agora daudaun nee atu halo rekrutamentu ba materia iha area produtivu ninia, atu koopera deit ba industria, depois mak foti husi industria mak mai hanorin, hanesan parte tempu deit, profesores matematika, biolojia, inglês no português nee katak, nee liu husi rekrutamentu, maibe ba materia produtivu agora nee lori ema nee mai husi area industria nian.
“Ezemplu hanesan manager hotel sira, ita lori ema sira nee mak mai direitamente hanorin, para kuandu ekipamentus pratika nian la sufisiente, atu nunee lori ita nian estudantes sira nee ba direita iha sira nian industria. Foin daudaun nee ita hetan ajuda 10 mil, nee responde ba iha sasan pratika nian ba iha departamentu tolu nee, nee mak hola ekipamentus pratika nian, projetor, desktop, printer rasik, tanba nee ita nian estudantes sira depois de simu teoria, depois halo pratika,” haktuir nia.
Iha fatin ketak, Diretor Eskola ESTV-IT 28 de Novembro Becora-Díli, Tomas Pinto dehan, oras nee daudaun eskola ESTV-IT 28 de Novembro Becora-Díli, presiza aumenta profesores espesialidade ba departamentu haat neebe eziste iha eskola refere, ho ekipamentus neebe iha, estudantes sira nafatin halo pratika.
“Nunee mos ami presiza ita nian profesores ba area produtivu ka profesores neebe mak iha area espesialidade hanesan eletronika, informatika, arte Grafica no multi media nian, ba departamentu haat nee mak ami sei presiza profesores nain 9 ou bele nain 12 tan, atu nunee hodi responde nesesidade estudante sira nian iha ami nian eskola,” nia informa.
(jac)
