DILI, STLTIMORLESTE.com – Tribunal Judisial Primeira Instansia Dili (TJPID) iha loron Sabadu (11/07/2026) liu husi desizaun ikus ba prosesu sumariu, deside aplika pena multa ba arguidu nain lima (5).
Arguidu nain 5 ho inisial ACC, VdG, TFS, VCAG no CSGDC, Ministeriu Publiku (MP) akuza ho krime Ofensa Integridade Fizika Simples neebe previstu iha artigu 145 husi Kodigu Penal, tanba baku lezadu Leonardo Alves.
Iha prosesu sumariu nee, Juiz prosesu Jose hare katak krime refere ho nia natureza semi publiku, lei fo dalan antes atu hakat ba iha julgamentu sei liu husi tentativa konsiliasaun.
Iha tentativa konsiliasuan nee lezadu Leonardo Alves husu Tribunal atu taka prosesu nee, maibe ho kondisaun ida katak, arguidu nain lima tenke fo osan US$ 400 ba lezadu hodi selu fali gastu neebe lezadu hasai ona hodi sosa ai moruk.
Rona lezadu nia deklarasaun, arguidu nain lima mos aseita. Tanba nee Juiz prosesu deklara katak, arguidu sira aseita ona maibe osan seidauk fo ba iha lezadu, tanba nee iha loron Segunda (13/07/2026), arguidu sira fo ona osan US$ 400 ba lezadunmaka Tribunal foin homologa prosesu nee.
Maibe iha sala julgamentu laran, Tribunal haruka arguidu sira hamrik hodi husu deskulpa ba lezadu.
Tuir kronolojia katak, kazu nee akontese iha loron 09/07/2026, momentu neeba arguidu nain lima ho kondisaun lanu, hodi halo agresaun ba lezadu.
Tanba nee lezadu sofre kanek iha ulun, kakorok hodi ba halo tratamentu iha hospital.
Prosesu sumariu nee prezide husi Juiz Jose Maria, Ministeriu Publiku reprezenta husi Prokurador Rafael, arguidu nain lima hetan asistensia legal husi Defensor Publiku estajiadu nain ida.
(ter)
