DILI, STLTIMORLESTE.com – Tribunal Judisial Primeira Instansia Dili (TJPID) iha loron Sabadu (11/07/2026) halao prosesu primeiru interogatoriu ba kazu jogu online Scamming Call Centre, neebe Polisia detein iha Bebonuk.
Arguidu nain sia nulu resin neen (96) submete ona mai iha Tribunal, hodi tuir prosesu primeiru interogatoriu.
Arguidu sira nee akompanha husi Polisia Sientifika Investigasaun Kriminal (PSIK) no too iha Tribunal iha oras tuku 3:00 loraik.
Ofisial Justisa halo samada ba arguidu sira nia naran no arguidu sira sei tama ba iha sala julgamentu, hodi halo identifikasaun husi Juiz Ivan Patrocenio.
Arguidu nain hira laos deit mane inklui feto balu. Tuir regra Juiz prosesu sei halo identifikasaun, tama ba iha faze alegasaun mak foin tama ba iha faze despaisu Tribunal nian.
Prosesu primeiru interogatoriu nee prezide husi Juiz Ivan Patrocenio, Ministeriu Publiku (MP) reprezenta husi Prokurador João Marques, arguidu sira hetan asistensia legal husi Advogadu Privadu.
Rekorda katak, Ekipa konjunta husi Servisu Sekreta Polisia Nasional Timor Leste (PNTL) no Polisia Sientifika Investigasaun Criminal (PCIC) detein sidadaun estranjeiru ho nasionalidade Xines, iha operasaun nee halao iha Aldeia 20 Setembru, Suku Bebonuk, Munisipiu Dili.
Operasaun nee halao tanba deskonfia katak grupu sidadaun estranjeiru sira nee envolve iha atividade jogu online ilegal no scam call center.
Durante operasaun, ekipa autoridade sira prende sasan elekroniku barak, inklui komputador hamutuk unidade 88, laptop unidade 13 no telemovel neebe uza hanesan evidensia ba investigasaun.
(ter)
