DILI, STLTIMORLESTE.com – Tribunal Judisial Primeira Instansia Dili (TJPID) iha loron Domingu (12/07/2026) liu husi despaisu ikus ba prosesu primeiru interogatoriu, deside aplika medida haat (4) ba arguidu nain 28 no medida rua (2) ba arguidu nain ida (1).
Arguidu sira nee Ministeriu Publiku (MP) neebe reprezenta husi Prokurador Domingos Gouveia Leite, promove mai iha Tribunal ho krime haat (4), Burla Informatika, Asosiasaun Kriminoza, Brankamentus Kapitais no Jogu Ilisitu.
Iha depaisu nee, Juiz prosesu Jose Gonsalves deside aplika medida haat (4) ba arguidu nain 28, hanesan medida Termo Indentidade Rezidensia (TIR) no Aprezentasaun Periodika (AP) atu arguidu sira aprezenta aan iha eskuadra polisia neebe hela besik ba fulan ida dala rua, medida proibisaun de auzensia hodi sita arguidu sira nia pasaporte no medida kausaun kada arguidu sei selu osan US$ 2.500. Tribunal mos fo prazu semana ida ba arguidu nain 28 hodi selu kausaun neebe iha, hahu husi loron 20 fulan Julhu tinan 2026. Tribunal mos esplika ba arguidu sira la kumpri medida nee, Tribunal sei halo alterasaun hodi arguidu sira ba tama Prizaun Preventiva.
Enkuantu arguidu ho inisial CCC Tribunal aplika deit medida TIR no kausaun 2.500, atu arguidu selu kausaun no livre husi medida Aprezentasaun Periodika. Tribunal mos liu husi despaisu entrega hikas arguidu CCC nia pasaporte no osan ho montante US$ 6.500 neebe foin lalais autoridade seguransa halo aprensaun iha Metiaut hetan nee.
Prosesu primeiru interogatoriu nee prezide husi Juiz Jose Gonsalves, Ministeriu Publiku (MP) reprezenta husi Prokurador Domingos Gouveia Leite, arguidu sira hetan asistensia legal husi Advogadu Privadu nain rua.
Rekorda katak, antes nee operasaun konjunta entre Komando Polisia Nasional Timor Leste (PNTL) liu husi Diresaun Servisu Investigasaun Kriminal Nasional (DSIK), no Servisu Migrasaun neebe halo iha loron 08 fulan Julhu tinan 2026, hodi halo demantelamentu ba fatin Jogu Online no Scam Call Centre hodi detein sidadaun estranjeiru hamutuk nain 29.
“Iha loron 08 fulan Julhu tinan 2026, iha oras 11:30, ami hetan kontaktu husi Servisu Migrasaun katak sira detekta uma ida iha parte Aldeia Lenkari, Manleuana, Dom Aleixo neebe suspeita ba iha atividade ilegal nian, nunee DSIK ba iha fatin neeba halo intervensaun no deteta katak sidadaun Xineza hamutuk 28 no sidadaun Cambodia ida neebe halo hela sira nia atividade Scamming nian neebe identifika mos Online Game iha fatin neeba,” esplika Porta Voz Komando PNTL, Superintendente Xefe Polísia João Belo dos Reis, liu husi konferensia imprensa.
Nia hatutan, polisia halo buska ba sira nia fatin, kaptura sira no lori sira mai iha DSIK. Evidensia sira neebe hetan iha fatin neeba mak telefone hamutuk unidade 60, Tablet Samsung hamutuk unidade 2, Router hamutuk unidade 3, Komputador Portatil (Laptop) hamutuk unidade 32 no Osan cash hamutuk US$ 5.632 no sira nia pasaporte mos asegura hamutuk 29 kompletu.
(ter)
