AMBENO, STLTIMORLESTE.com – Selebra loron mate maktoban, Pe. Drs. Domingos Sequeira neebe mate iha loron (11/07/2012-11/07/2026) iha Hospital Carlos Jakarta, Indonezia, tinan 14 liu ba, ho selebra misa agradesimentu neebe prezide husi Amu Vigararia Santo Antonio Oecusse, Pe. Carlos de Deus ho Amu selebrante husi Parokia Padiae, Baokana no Kuaze Parokia Pasabe iha Semiteriu Cruz, Bairru Santa Rosa. Aleinde nee Amu Vigariu Parokia Nossa Senhora do Rosario Oecusse, Pe. Florindo de Jesus fo bensaun ba Kapelino Pai Nosso neebe konstrui husi Padre Matebian nia alin, Bartolomeo Sequeira.
Liu husi Omilia, Amu Vigararia Santo Antonio Oecusse, Pe. Carlos de Deus, liu husi ninia omilia iha Kapelino Pai Nosso Semiteriu Cruz Santa Rosa Suku Costa, Postu Administrativu Pantemakassar RAEOA, Sabadu (11/07/2026) dehan, sai nai lulik la fasil, tanba Kanonik nian, laos profisaun maibe misaun, funsionariu ida wain hira sai funsionariu nia sei halao ninia funsaun, tuir skill ka kunhesimentu neebe nia iha, halo tuir matenek neebe nia iha halo profisaun tuir graun neebe nia hetan, diferente ho nailulik ida, laos atu halao ninia funsaun, maibe sai Nai Lulik atu halao misaun kristu nian.
“Entre profisaun no misaun, buat rua neebe la hanesan, tanba nee maka ema barak hili profisaun duke misaun, iha evangelu neebe ohin ita rona ona katak, bolu barak maibe hili uitoan deit. Halao knaar lulik ida, laos ema hotu bele, maibe ba ema sira neebe bele so maromak rasik maka hili, tuir maromak nia hakarak, laos ita ema nia hakarak,” dehan nia.
Nia haktuir tan katak, sai nai lulik laos ema nia hakarak rasik, maibe maromak nuudar lulik nia nain, mak sei deside, maromak mak sei hili ema ida atu halao knaar Nai Maromak nian. Iha moris nuudar Nai Lulik nian, sei hasoru dezafiu lubuk ida, sei liu husi aitarak laran, fatuk klaran, nakukun laran, rai naruk no tentasaun aat ruma iha tempu ruma neebe tenta estraga no bele mos hasai nia vida.
“Ita haree iha media sosial sira, iha rai boot sira, bispu sira ema tiru mate, Nai Lulik sira mos ema oho mate, ida nee knaar Nai Lulik sira nian sempre hasoru dezafiu iha knaar evanjelhu nian. Hanoin fali lia fuan neebe Nai Jesus rasik dehan, hau haruka imi ba, hanesan bibi sira iha asu fuik sira nia leet. Jesus la dehan haruka ba bibi atan sira ba bibi sira nia leet, maibe Jesus dehan, Hau haruka imi iha asu fuik sira leet. Misaun neebe Nai Lulik sira ba hodi haklaken mak redensaun, maksoin no libertasaun, salvasaun, maibe iha pratika, Nai Lulik sira laos hasoru deit bibi sira, maibe hasoru mos asu fuik sira. Asu fuik sira iha nee, Jesus refere ba ema sira la simu ou rejeita liafuan diak maromak nian,” afirma Pe. Carlos De Deus.
Nia dehan, evanjelhu neebe foin rona, fo esperansa ba sarani no familia maktoban Pe. Drs. Domingos Sequeira ho sarani sira hotu, fo laran metin, fo korazen.
“Jesus ohin dehan, ksolok ba imi, wainhira tan Hau, ema hateten aat imi, duni imi, foti lia bosok oi-oin hasoru imi. Imi haksolok ba, hahii ba, basa imi nia kolen iha lalehan wain liu. Selebrasaun ida nee, lori ita ba hanoin fila fali ba tinan 14 liu ba kotuk, iha Nai Lulik Padre Drs. Domingos Sequeira ninia tempu, Amu Sequeira konsege hakat liu dezafiu sira nee hotu no luta makaas, liu-liu luta ba dioseze Dili too halibur Nai Lulik diosezanu sira hotu iha fatin ida deit, ema bolu dehan Uniaun Arkedioseze Dili, iha Maloa Ailok laran,” afirma nia.
Nia dehan, iha momentu neeba nia isin maten antes translada mai Oecusse, sei lori iha uma uniaun Maloa Ailok laran. Aleinde sai fundador ba uniaun Arque Dioceze Dili nian, Pe. Domingos Sequeira rasik sai modelu no ezemplu ba Nai Lulik ida neebe bele dehan katak, vizioner, iha kapasidade neebe brilante, no sai mestre intelektual neebe forma seminarista lubuk ida. sai matenek no ikus mai, seminarista lubuk ida sai Nai Lulik matenek mos, tanba amo Domingos Sequeira, nia formasaun.
“Hau nia dosente omenitika, dosente direitu kanoniku ninian, Pe. Drs. Domingos Sequeira nia luta makaas ba Nai Lulik, nia moris hamutuk nuudar familia ida, iha Arque Diocese Dili nia laran, luta makaas ba seminarista sira nia futuru, la hatene kolen hodi fahe matenek no halo ema barak matenek tanba matenek neebe nia iha, nia matenek la rai ba nia aan rasik, maibe nia fahe, padre ida neebe haraik aan, padre ida neebe hatene akomula ema hotu-hotu,” afirma nia.
Husu ba sarani sira atu haraik aan hanesan Pe. Domingos Sequeira, liu-liu ba Tiu Eke Bartolomeo Sequeira ho nia familia sira, atu buka halibur malu hamutuk, sai hanesan exemplar ida neebe Amu Domingos Sequeira rai hela.
“Maske oras nee Amu Domingos Sequeira la iha ona iha ita nia leet, maibe ho onestu no sinseiru katak, nuudar Nai Lulik Diosezana ida, Amu Sequeira sai modelu tebes ba Nai Lulik Diosezana tomak no sai modelu fiar nain ba sarani sira. Ita hotu, liu-liu Familia Sequeira lakon nai Lulik Santo ida, ba ami nai lulik foun sira, ami lakon mestre diak ida neebe tuir loos ami sei presiza nafatin nia matenek hodi banati tuir.
Oras nee Amu Domingos Sequeira la iha ona ita leet, ita la haluha nia iha mundu seluk, nunee liu husi selebrasaun misa ohin, ita reja nafatin ba Amo Domingos Sequeira atu harohan nafatin mai familia, harohan nafatin mai sarani sira, liu-liu harohan nafatin ba Amu Lulik sira, atu banati tuir nafatin saida maka Amo Domingos Sequeira, husik hela ba ami,” haktuir nia.
Iha biban nee, Dircia da Costa reprezenta Familia Pe. Domingos Sequeira hatoo agradesimentu ba Amo Parokia Nossa Senhora do Rosario Oecusse, Amo Vigararia Santo Antonio Oecusse, Pe. Carlos de Deus, ho amo Parokia Padiae, Baoknana, Oesilo no Kuaze Parokia Pasabe ho madre sira husi Kongregasaun Carmelita, Dominicana, SSPS ho nai lulik sira hotu, Katekista sira, Konselhu Pastoral Parokia sira ho sarani no familia tomak neebe ohin partisipa iha misa Agradesimentu selebrasaun tinan 14 tinan matebian Maktoban Pe. Domingos Sequeira.
Iha misa nee mos, Amu sira fo bensaun ba Rate, viza avo, Avo feto Avo Mane, tiu sira nian husi Maktoban Pe. Drs. Domingos Sequeira nian neebe hadia iha semana hirak liu ba no ohin loron fo oportunidade ba Amo lulik sira atu fo bensaun ba rate sira nee.
(jos)
