DILI, STLTIMORLESTE.com – Apresia ba programa husi Prezidente Republika Jose Ramos Horta nia neebe tulun ona povu kbiit laek sira liu husi halo uma dignu ba povu kbiit laek, husu kontinua, tanba povu barak sei presiza tulun.
Feto Potensia Maria Amaral ba jornalista STL iha nia knaar fatin Kaikoli, Segunda nee (13/07/2026) hatete, durante nee Prezidente Republika nia programa neebe sosiedade sivil sira haree kapaas tebes, tanba bele ajuda no fo apoiu ba povu kbiit laek sira, ida nee labele para, maibe kontinua tanba povu barak sei hela uma aat.
“Ita haree programa neebe durante nee Prezidente liu husi halo uma dignu ba povu neebe vuneravel nee diak, husu atu kontinua programa nee,” katak Maria.
Nia hatete, lo-loos nee programa Governu nia maibe Prezidente nuudar aman ba nasaun iha hanoin hadia povu nia moris, ida nee mos diak.
Husu mos Governu liu husi Ministeriu relevante tenke halao programa apoiu povu kbiit laek, labele hein Prezidente Republika mak tun direita, tanba Prezidente haree ba nasaun nian, maibe durante nee Prezidente ho nia inisiativa apoiu ida nee fuan ba povu tanba Prezidente hili husi povu.
Nunee mos Prezidente Republika, Jose Ramos Horta hatutan, programa nee sei kontinua nafatin ba oin, no Prezidente mos antes nee husu Autoridade lokal sira neebe mak identifika komunidade neebe mak moris ho uma neebe vuneravel bele hatoo proposta mai iha palasiu Prezidensia nunee bele fo apoiu urjente.
“Ida nee sei kontinua hau atu aranka ba abu Dhabi iha 13 vizita hanesan privada para hatudu amizade solidaridade na United Arabe Emirates maibe vizita nee adia tiha ona entau iha tempu livre entau loron 13 hau sei haree tok ba Baucau ka ba Laklubar hau sei haree fatin ruma,” dehan Prezidente Republika.
Aleinde nee Prezidente Republika hatutan, apoiu sosial nee kompetensia husi Governu laos Prezidente Republika nia kompetensia maibe Prezidente ho konsiensia rasik lataka matan ba povu neebe moris iha terus no susar laran.
“Nuudar Prezidente, maske asuntu asaun sosial no abitasaun laos kompetensia direta Prezidensia nian, hau nia konxiensia labele hasees aan husi susar neebe povu hasoru. Hau labele taka matan. Tan nee, hau foti responsabilidade hodi fo liman no fo ajuda lalais ba situasaun urjente sira tanba moris ho dignidade mak nuudar direitu povu nian,” dehan PR Horta liu husi nia pajina Facebook.
Xefe Estadu hatutan, hahu husi simu mandatu nuudar Prezidente too mai ohin loron halo ona uma dignu ba povu neebe funeravel uma hamutuk 39.
“Too ohin loron, maizumenus, ita konsege harii ona uma 39 ba povu, hodi fo fatin hela neebe dignu ba ita nia maluk sira, fo apoiu sosial diretu ba família 10,747, inklui ema ho defisiensia nain 1,653 neebe presiza ita nia fuan no atensaun. Ita mos la haluha ita nia oan sira iha orfanatu sira nain 283 mak hetan ona apoiu, apoiu ba iha mikro-negosiu hamutuk 90, apoiu grupu kultural 387, estudante Timoroan 35, no grupu desportivu 50,” dehan Prezidente Horta.
Xefe estadu hatutan, iha situasaun dezastre natural Prezidensia apoia vítima hamutuk uma kain 129, no agradese liu husi doador laran-luak sira hamutuk nain 16 neebe fo mos sira nia apoiu. Nee laos deit kona-ba kbiit, maibe inisiativa ida ne konaba domin ba povu.
(eme)
