DILI, STLTIMORLESTE.com – Ministeriu Edukasaun (ME) husu inan aman fo apoiu ME, atu nunee iha komunikasaun neebe diak hodi reforsa prosesu ensinu aprendizajen ba estudantes sira.
Tuir Ministra Edukasaun (ME), Dulce de Jesus Soares katak, bainhira profesor sira hanorin ho lo-loos, mezmu ME infrenta problema laos kiik oan, maibe neineik ho serteja no komitmentu kontinua halao servisu nee ba oin, inan aman sira kontinua apoiu ba ME liu husi estudantes sira, bainhira deit mak sira presiza apoiu, karik la hatan mesak, maibe tenke koalia ba ME, tanba presiza koalia ba malu no presiza iha komunikasaun ba malu, nee importante tebes, atu nunee bele reforsa prosesu ensinu aprendizajen iha eskola ida-idak.
“Ita nian kurrikulu nasional baze neebe husi ME liu husi kurrikulu kria tiha ona, ita iha ita nian kurrikulu, signifika katak estudantes sira neebe mak agora daudaun nee, ita nian profesores sira nee hanorin kontiudu kurrikulu ensinu baziku nian, hatudu evidensia katak, kurrikulu ida nee laiha diferensia ho kurrikulu husi nasaun seluk nian, signifika ita nian kurrikulu neebe mak agora ita hatudu seklu 21 ME nian servisu iha neebe mak halao eskola sira hatudu evidensia,” dehan ME, Dulce ba jornalista sira iha sala konferensia ME, Segunda nee (13/07/2026).
Nia dehan, bele iha dezempenu neebe mak diak husi profesores no estudantes sira, komisaun nasional UNESCO neebe mak hamahan aan iha ME nian papel, tanba sira mak durante nee halo servisu ida fo formasaun ba profesor sira iha area matematika, siensia, bainhira halo revizaun ba kurrikulu iha 2015, iha momentu nee ba halo revizaun ba livrus nee, hamosu livrus ezersisiu.
“Agora ita hein katak, tinan hirak mai nee ita bele reforsa tan ou estabelese tan laboratoriu, hanesan agora laboratoriu neebe mak iha ona EBC 30 Agostu Comoro, kuaze iha munisípiu laboratoriu ida, para bele halo pratika matematika, siensia, geografia. Maibe ita presiza kria laboratoriu barak liu tan iha postu administrativu, nunee profesores no estudantes sira bele kontinua halo pratika iha laboratoriu sira nee,” nia informa.
Nia akresenta, maibe labele hanorin, tanba governu liu husi ME seidauk estabelese laboratoriu, entaun labele halo pratika, tanba iha livrus ezersisiu ba siensia no matematika, pratika seluk nee profesor sira matenek uza livrus ezersisiu sira nee, bele halo pratika prosesu aprendizajen.
“Dala ida tan, hau hakarak aproveita oportunidade ida nee hanesan mos xamada ida ba profesor sira neebe mak hanorin matematika, siensia atu labele hein demais laboratoriu, tanba livrus nee, iha mos maneira ida neebe mak ajuda ita atu bele halo pratika, mezmu iha fatin balun laiha laboratoriu,” dehan nia.
(jac)
