DILI, STLTIMORLESTE.com – Aban loron 14 Julhu 2026 jornalista nain 25 husi media privadu no estatal sei aranka ba Xina tuir formasaun, neebe organiza husi Institute of International Studies and Advanced Training (CICG) durante fulan ida.
Tuir nota informativu neebe STL asesu iha pajina Facebook ofisial Sekretariu Estadu Komunikasikan Sosial (SEKOMS) katak, aban jornalista nain 25 sei aranka ba Xina tuir formasaun neebe organiza husi CICG. Objetivu husi formamsaun refere atu dezenvolvimentu talenta no troka esperiensia iha area komunikasaun internasional, tradusaun lingua estranjeira nivel aas no komunikasaun interkultural.
Durante delegasaun jornalista nain 25 sei aprende tuir konteudu prinsipal sira mak hanesan, kondisaun nasional no tradisaun kultural, introdusaun kona-ba dezenvolvimentu politika, sosiabilidade, istoria, kultura no aspetu sira seluk iha Xina.
Seluk mak haree komunidade Xina-ASEAN ho futuru komun, inisiativa “Belt and Road” no Kooperasaun Xina ho Timor Leste, filozofia no prtika dezenvolvimentu modernizasaun Xina, reportajen notisia Internasional husi media prinsipal Xina, dezenvolvimentu inovador no pratika media Online Xina no ligasaun entre dezenvolvimentu Xina nian.
Aleinde nee mos sei halao vizita kampu ida ba Prefetura Autonomu Dali Bai, Provinsia Yunnan, neebe partisipante sira sei vizita organizasaun media lokal sira, hanesan Dali Radio and Television Station, hodi halo diskusaun no troka hanoin. Nomos sei halao vizita area demonstrasaun ba konstrusaun sivilizasaun ekolojika iha Provinsia Yunnan, atu haree fatin kultural no istoriku sira neebe konhesidu iha fatin refere.
Orador sira iha Xina neebe sei prezensa iha formasaun refere, Dosente He Wenping nuudar investigadora iha Chinese Academy of Social Sciences neebe foka liu ba investigasaun relasaun internasional, Yang Yue nuudar Adjuntu Diretor no Investigador iha Institute of Asian Studies, China Foreign Affairs University, sei lori materia foka liu ba investigasaun diplomasia no komunikasaun internasional.
Xiong Wei nuudar profesore iha Department of Diplomacy and Foreign Affairs Management, China Foreign Affairs University sei aprezenta materia foka liu ba dezenvolvimentu diplomasia no komunikasaun internasional. Liu Chang nuudar Diretor ba English Desk, Departamentu Notisia Internasional iha Agensia Notisia Xinhua, sei aprezenta materia foka liu ba serbisu foti notisia, edita, reportajen ho lian Ingles, no komunikasaun internasional.
Wang Xiaohui nuudar eis editor Xefe ba China.org.cn, sei aprezenta materia foka liu ba media online no komunikasaun internasional no Li Yang nuudar diretor ba editorial Office, Commentary Department iha China Daily; foka liu ba investigasaun media no komunikasaun internasional.
Jornalista nain 25 neebe sei aranka ba Xina iha loron 14 Julhu nee, kompostu husi media privadu sira hanesan, Suara Timor Lorosa’e (STL) TVET, SMNEWS, GMNTV, SAPNEWS, DILI POST, INDEPENDENTE, TIMOR POST, LAFAEK NEWS, inklui media estatal mak hanesan RTTL.EP no TATOLI sei akompanha husi media SEKOMS no Assessor SEKOMS.
(tom)
