DILI, STLTIMORLESTE.com – Tribunal Judisial Primeira Instansia Dili (TJPID) iha loron Segunda nee (13/07/2026) halao prosesu julgamentu ba arguida ho inisial REdCX hanesan feen, neebe halo krime hasoru lezadu inisial JdJ hanesan laen, neebe akontese iha Fomento, Dili.
Iha indisus sufisiente katak, iha loron 1 fulan Marsu, lezadu hamutuk ho arguida halo planu atu faan dosi. Lezadu hateten ba arguida halo dosi atu ba faan, maibe arguida la aseita no hakarak hein deit labarik iha uma.
Husi ida nee mosu diskusaun, arguida ho nervoju foti tudik boot ida nia naruk liu sentimu 10, hodi taa iha lezadu nia ain karuk no kontinua taa iha kabas karuk, hetan kanek kmaan tanba lezadu tahan ho liman.
Konsekuensia husi arguida nia hahalok, lezadu sente trauma tanba hanesan feen no laen. Arguida hatene katak, bainhira lori tudik boot taa ema nia isin bele hetan kanek, maibe nia halo nafatin.
Arguida halo hahalok nee livre, deliberada konsientemente, hatene lei bandu no proividu tuir lei. Arguida hanesan autor material ba konkursu krime Violensia Domestika lei numeru 07/2010 ho Forma Ofensa Integridade Fisika Simples artigu 145 husi Kodigu Penal, no lei arma branka numeru 05/2017.
Hatan ba faktus nee arguida deklara katak, faktus neebe konsta iha akuzasaun loos hotu. Arguida deklara, depois de akontese problema, agora sira diak malu ona no kontinua moris hamutuk.
Arguida deklara, asaun neebe halo ba lezadu foin primera vez, arepende tebes ba hahalok nee. Arguida deklara momentu neeba lakohi halo dosi, tanba labarik sei idade kiik.
Aleinde nee lezadu reforsa tan akuzasaun neebe iha katak, arguida halo duni asaun hosoru lezadu, maibe hahu husi neeba mai la iha tan akontesimentu ruma ona. Lezadu deklara kanek neebe iha lori semana ida mak diak. Lezadu perdua arguida, tanba arguida hanesan lezadu nia feen.
Rona tiha arguida no lezadu, iha alegasaun Prokurador mantein ho akuzasaun neebe iha, husu Tribunal atu aplika pena prizaun tinan 3 suspende tinan 3 ba arguida.
Enkuantu husi parte defeza nian husu Tribunal tetu atu aplika desizaun neebe justu ba arguida, tanba foin primera vez mai iha Tribunal, arependimentu ona.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Kolektivu Jumiati Freitas, Jose Gonsalves, Jose Quintao, Ministeriu Publiku reprezenta husi Prokurador Nelson, arguida hetan asistensia legal husi Defensora Publika Laura Valente.
(ter)
