DILI, STLTIMORLESTE.com – Tribunal Judisial Primeira Instansia Dili (TJPID) iha loron Segunda nee (13/07/2026) halao julgamentu ba arguidu inisial MdR, tanba komete krime hasoru lezada inisial JS.
Iha indisus sufisiente katak, iha loron 06 fulan Junhu tinan 2024, arguidu halo violensia hasoru lezada iha Merkadu Taibesi, Lahane Dili.
Motivu husi problema nee tanba arguidu hasai liafuan mal ba lezada, ho ida nee mak lezada mos simu hasoru arguidu.
Wainhira tuku tiha lezada, arguida dudu lezada monu tun ba rai hodi rezulta kalen koa kanek iha kabas parte loos. Konsekuensia husi arguidu nia hahalok nee, lezada sente moras no bubu iha nia rentos, moras tanba kanek iha kabas parte loos, lezada mos ba halo tratamentu iha PRADET.
Bainhira akontese tiha problema arguidu halai tiha ba Ermera, husik lezada ho nia oan sira mesak mak iha Taibesi.
Katak iha tinan 2020, arguidu halo mos agresaun fizika hasoru lezada, hanesan lori liman tuku iha lezada nia ulun no rentos.
Konsekuensia husi arguidu nia hahalok nee halo lezada sente moras hodi ba hatoo keixa. Tanba nee, Ministeriu Publiku akuza arguidu komete krime Maustratus ho Forma Violensia Domestika.
Hatan ba faktus nee arguidu konfesa katak, halo duni agresaun hasoru lezada, maibe sira diak malu ona, arguidu mos arepende tebes ba nia aktu nee.
Aleinde nee, lezada mos reforsa katak, arguidu halo duni agresaun hasoru lezada, depois akontese problema too mai la iha tan problema ona.
Iha alegasaun Prokurador Bartolomeo de Araujo deklara katak, atu halo prevensaun iha futuru, husu Tribunal atu aplika pena prizaun tinan 2, suspende ba tinan 2.
Enkuantu husi defeza husu Tribunal tetu atu aplika pena neebe justu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Koletivu, Arjentino Nunes, Zulmira Auxiliadora, Juiz estajiadu nain ida, Ministeriu Publiku reprezenta husi Prokurador Bartolomeo de Araujo, arguidu hetan asistensia legal husi Defensor Publiku, Anzelmo Akara.
(ter)
