DILI, STLTIMORLESTE.com – Liu husi Komunikadu Imprensia Media F-FDTL neebe STL asesu katak, Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” hamutuk ho reprezentante sira husi linha ministerial partisipa iha enkontru Ekipa Komisaun Organizadora Konjunta ba preparasaun Dili International Marathon 2026, neebe sei halao iha Sala Enkontru Palásiu Prezidensiál, Aitarak Laran Dili.
Iha enkontru nee dirije diretamente husi Prezidente Repúblika (PR), Jose Ramos Horta no partisipa husi membru Governu, autoridade sira no entidade relevante neebe integra iha Ekipa Komisaun Organizadora Konjunta.
Entretantu, objetivu husi enkontru ida nee mak atu halo avaliasaun ba preparasaun eventu, reforsa koordenasaun no asegura preparasaun hotu lao tuir planu atu promove Timor Leste (TL) liu husi eventu desportu internasional ida nee.
Iha enkontru refere, ekipa komisaun halo atualizasaun konaba progresu preparasaun eventu, inklui planu organizasaun, lojístika no planu seguransa.
Diskusaun sira nee importante atu garante katak, Dili International Marathon 2026, neebe sei realiza iha loron 08 Agostu 2026, bele halao ho diak, hakmatek no ordenadu, ho partisipasaun husi atleta Nasionál no internasiona.
Enkuantu iha enkontru nee mos partisipa husi Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” no membru governu, autoridade sira husi setor Seguransa no Defeza, inklui PNTL.
(jen)
