AMBENO, STLTIMORLESTE.com – Durante fulan 6 nia laran, hahu husi Janeiru too Junhu tinan 2026, Diresaun Rejional Transporte Terrestre no Komunikasaun (DRTTK) Rejiaun Administrativa Espesial Oecusse Ambeno (RAEOA) rekolha reseita ba konfre Estadu husi Portu Internasional Iwao Kitahara Mahata, Suku Kutete, hatama osan ba kofre Estadu hamutuk US$ 24.220,47.
Informasaun nee hatoo husi Koordenador Portu Internasional Iwao Kitahara Mahata, Suku Kutete, Postu Administrativu Pantemakasar, RAEOA, Miguel da Conceicao ba STL iha Gabinete PA-RAEOA Oebau Oecusse, Segunda (13/07/2026).
“Reseitas osan neebe maka hatama liu husi Portu Internasional Iwao Kitahara Mahata, Suku Kutete, ita konsege rekolha reseitas osan hamutuk US$ 24.220,47, iha fulan 6 nia laran, reseitas nee mai husi Ro kargu liu ro Success Irmao Timor hanesan ro Privadu husi Patraun Julio Mak, hamutuk US$ 10.528,75, reseitas husi kanalizasaun bee moos konsege hetan osan hamutuk US$ 3.540, nunee mos ro sira neebe hatama mina, osan hamutuk US$ 10.151,72,” Dehan Koordenador Portu Internasional Iwao Kitahara Mahata, Oecusse, Miguel da Conceição.
Nia haktuir tan katak, problema neebe dadaun sira hasoru maka menus pesoal hodi halo serbisu tanba foin lalais nee husi Autoridade RAEOA hamenus tan pesoal balun neebe maka halo serbisu iha Portu Internasional Iwao Kitahara M nunee mos menus ekipamentus hodi apoiu serbisu iha Portu nee, liu-liu kona ba transporte hodi halao serbisu.
“Programa prioridade neebe maka ami atu halo maka atu halo instalasaun ba ahi eletrisidade iha Portu Mahata tanba hafoin inaugura portu nee, too ohin loron ahi iha areadores Portu neee mak ladun funsiona ho diak, tanba nee ami sei hadia iha tempu badak,” haktuir nia.
Nia husu nafatin ba Autoridade RAEOA atu tau matan nafatin ba serbisu iha Portu Mahata, liu-liu fasilidade no ema atu serbisu hasae reseitas ba kofe Estadu tanba dadaun nee pesoal Portu Mahata nain 10 mak halo serbisu.
Iha fatin seluk, Diretor Diresaun Rejional Transporte Terrestre no Komunikasaun Oecusse (DRTTC), Domingos de Almeida reforsa kata, reseita rekolha nee, mai husi transporte maritima sira inklui kanalizasaun bee-moos.
Aleinde nee, reseita mai husi Postu Integradu fronteira (PIF) Sakato no Oesilo hamutuk US$ 1.260,00, iha fulan-Maiu tanba RAEOA foin mak aplika lei foun.
“Husi PPF Sakato, ita hetan osan US$ 1.170,00 no husi PIF Oesilo hetan US$ 90,00, reseita foin fulan ida deit tanba ita implementa lei nee iha fulan Maiu, neebe reseita nee, hela iha Kofre Estadu RAEOA tanba konta bankaria Oecusse nian,” nia hateten.
Iha fatin seluk, Domingos Colo nuudar Komunidade Mahata, husu ba Governu atu halo manutensaun ba areadores portu Mahata, liu-liu ahi eletrisidade tenke kontinua lakan hodi asegura mobimentu ema no sasan lao diak tanba dadauk nee, iha regras foun ona, ro la tama la autoriza ema hakail ikan iha Portu Mahata.
(jen)
